Dili na lang unta samok-samokon sa “duopoly” ang pagsulod sa ikatulong telecommunications company dinhi sa nasud nga mohatag og mas paspas ug, tingale, barato nga internet connection.
Dili malikayan ang pagduda nga bulabogon sa duha ka higanteng telcos ang proseso aron makasulod ang Udenna-China Telecom dinhi sa nasud.
Ang Globe Telecom ug ang Smart-PLDT-Sun Group maoy nagbahin sa mga telecom subscribers sa nasud.
Siyempre, makuhaan kini sa higayon nga makasulod na ang Udenna-China Telecom.
Apan pagbuot sa katawhan ang pagpasulod sa ikatulo nga telco player. Tungod kini sa reklamo nga gawas nga mahal ang atong internet connection dinhi, hinay pa gyud kaayo ikomparar sa ubang mga nasud sa Asya.
May mga pagduda ang mga Pilipino nga kining duha ka players magsabotsabot lamang sa serbisyo nga ilang idalit sa mga tawo.
Ang ikatulong player misaad nga mohatag og mas paspas nga koneksiyon sa internet, butang nga gikalipay sa mga tawo.
Busa, angayan na lang pasagdan sa mga interest group ang pagsulod niining ikatulong player.
Aw, saad man hinuon kini ni Pres. Rody Duterte. Ug nasayod ko nga kining duha ka higanteng telco sa nasud karon hadlok kaayo sa presidente. Nag-ayo sila og bawian sa frequency nga iya sa kagamhanan.
Mag-ampo lang hinuon kita nga kining ikatulong telco dili ma-impluwensiyahan sa duha ka higanteng telco ug mahimo silang “baseline” sa maanindot nga internet connection ug value-added services ngadto sa mga subscibers nga dugay nang nagyawyaw sa serbisyo sa duha ka telco.
* * *
Ang class suit nga gisang-at sa 39 ka mga lumolupyo sa Naga batok sa Cemex, Mines and Geo-Sciences Bureau, City of Naga ug sa Province of Cebu kuyaw nga moigo sa mga hingtungdang indibidwal, opisina, o organisasyon.
Katungod sa mga residente ang pagkuwestiyon sa polisiya sa usa ka kagamhanang lokal. Busa ang kasong gisang-at modis-og kini base sa regulasyon.
Kun dili kini matarong og handle sa kagamhanan sa Naga, kuyaw usab kini nga mamahimong atsa nga moputol sa politikanhong pagkinabuhi sa pamilyang Chiong.
Mokalkal usab kini sa kuwarta sa pamilya aron pagdepensa sa kasong ilang giatubang.
Wala pa hinuon ko makadungog sa kaatbang sa mga Chiong kabahin sa maong isyu. Sa akong nahibaw-an, ang miatbang kang Valdemar Chiong, ang amahan sa incumbent mayor nga si Kristine Chiong, kauban nila sa politika kaniadto.
Si Delfin Señor mihiusa sa laing politikanhong pamilya sa mga Del Mar. Iyang tandem mao si Venci del Mar kansang igsuong surgeon nga si Dr. Ron del Mar mi-substitute pagkakandidato sa unang distrito batok kang Mayor Eddie Gullas.
Kun mokompiyansa ang mga Chiong sa Naga niining isyu sa quarry sa Cemex, kuyaw kun mao kini moguba sa ilang politikanhong ugma.
Obserbasyon ko lang kini. Wala pa usab kita masayod sa estratehiya sa usa’g usa.