Negosyo sa basura

Nakaamgo na ba ang pamunoan ni Mayor Tomas Osmeña nga nakamatikod na ang mga tawo sa siyudad sa Sugbo nga gi-negosyo ra gyud diay kining basura nga nagpasad sa dakbayan?

Kini human ang hepe sa Department of Public Services (DPS) sa Cebu City Hall nga si John Paul Gelasque mipahibalo nga mopalit na ang kagamhanan sa siyudad sa Sugbo og kaugalingong compactor trucks nga 21 ka buok balor og P232 milyones.

Sa pagkakaron, sumala pa ni Gelasque nga ang Cebu City Hall mogasto og P133.67 milyones alang sa abang sa garbage trucks samtang P286.8 milyones ang gibayad alang sa paghakot sa mga basura gikan sa Inayawan paingon sa pribadong labayanan.

Si Gelasque mismo ang miingon nga mas makadaginot ang kagamhanan sa siyudad kon mopalit kini og kaugalingong compactor trucks.

Apan, mga higala, sunod tuig pa paliton ang compactor trucks. Sa ato pa, pasagdan lang una sa pagkakaron sa administrasyon ni Tomas nga alkanse ang siyudad sa abang sa mga trak nga naghakot sa mga basura ug bayad sa pagpahakot gikan sa Inayawan paingon sa pribadong labayanan.

Taym pa ra gud, dili ba ang mga trak nga nanghakot sa mga basura sa siyudad iya man sa kompaniya nga gipanag-iya ni Konsehal Franklyn Ong, ang kapitan sa Barangay Kasambagan nga higala kaayo ni Tomas ug maoy nakadaog isip presidente sa Association of Barangay Council?

Wala ba kamo magduda nga ginegosyo nilang Tomas ug Franklyn ang basura sa siyudad?

Apan kay hapit naman ang Mayo 2019 nga eleksiyon, nakabantay tingali sila nga ang mga tawo nag-anam na og kamatikod sa binuang pinaagi sa basura.

Aw, layo pa man ang eleksiyon. Pero ambot kaha og maulian pa ba ang pagtuo sa mga tawo.

* * *

Sama ra usab sa suliran sa trapiko. Nagkarakara karon si Tomas pagpaayo sa mga karaan nga mga traffic lights. Gawas niini, gipatabang na sa kagamhanan sa siyudad ang mga barangay tanod pagmaneho sa trapiko.

Apan nagtuo ko nga ulahi na ang tanan. Nabatian na sa mga tawo unsay hinungdan sa trapiko ug kinsay hinungdan niini.

Kanang sa Mambaling area, ang ka-letse sa trapiko diha mopilit sa alimpatakan sa katawhan nga kini ang hinungdan sa pag-antos sa mga tawo tungod sa ka-trapik sa maong lugar.

Ug kini tungod sa pagpamugos nianang underpass nga wala kinahanglana.

Ang mga traffic lights sa siyudad sa Sugbo mga “obsolete” na ug dili na tukma sa estado sa panahon karon nga nagkadaghan ang mga sakyanan tungod sa nagkataas nga populasyon.

Ang mga tawo nasayod nga kon wala pa babagi ni Tomas kadtong Metro Cebu traffic body, sulbad na unta ang suliran sa trapiko karon.

Gawas sa maong traffic body, kun wala pa babagi ni Tomas ang LRT ni Eddiegul, tunhay na unta ang biyahe sa mga tawo karon.