Taliabot na usab ang Pasko ug nagsugod na ang ubang mga establisamento ug mga panimalay sa pagsab-it og mga dayan-dayan aron pagpanindot sa ilang paminaw samtang nagkaduol ang selebrasyon.
Makita na usab sa mga tindahan ang mga baligyang pakidlap-kidlap nga mga suga, Christmas tree, parol, ug uban pa. Nagbaha na karon og mga produkto para sa Pasko ang mga nagkadaiyang mga tindahan ug posibleng ang uban niini mga substandard.
Apan dili usab angay kalimtan ang kaluwasan sa panimalay ug mga kinabuhi kon mamalit niining mga dayan-dayan tungod kay makadaghan nang higayon nga adunay mga aksidente sama sa sunog nga milamoy og kabalayan nga ang hinungdan mao kining mga dayan-dayan sa Pasko.
Mas maayong batason sa pumapalit ang pagsiguro nga may International Compliance Certificate (ICC) ang produktong ilang paliton kay kini miagi gyud og inspeksyon pagsigurong luwas kining gamiton.
Angay tingaling magsugod na ang Department of Trade and Industry sa pagsubay niining mga tindahan aron tangtangon sa merkado kining mga substandard mga produktong makaingon og sunog sama sa Christmas lights. Angay magmatngon ang mga mamalit og dayandayan para sa Pasko nga siguraduhong dili substandard ang ilang pamaliton ilabi na kadtong mogamit og kuryente tungod sa kapeligro niini sa sunog.
Magmatngon usab sa load sa kuryente kon mamutang og daghang Christmas lights kay gawas nga modako ang balayrunon sa kuryente dako pa gyud ang purohan nga mag-overload kini ug mobuto.
Ang uban ganing mga managsilingan nagpanindotay ug nagpalabwanay sa gidaghanon sa ilang mga dayan-dayan nga daw gustong ipakita sa uban nga may ikasarang sila ug may katungod silang mopabongga sa ilang dekorasyon.
Ibutang gyud kanunay sa hunahuna nga dili ang gidaghanon sa gidayan-dayan o kahayag gikan sa mga sugang mokidlap-kidlap sa panimalay masukod ang diwa sa Pasko. Kay bisan og walay dayan-dayan kon ang pamilya nagminahalay sa usa’g-usa sama ra gihapon kini og Pasko sa tanang panahon.