EDITORYAL - Makaguba sa imahe sa PNP

Kinahanglang ipakita sa kapolisan nga seryoso sila ug maninuod batok sa tanang mga kriminal. Kini bisan pa man og ang kriminal ilahang kauban.      

Sa miaging buwan didto sa Manila, usa ka anti-drug operation ang gihimo nga niresulta sa pagkasikop sa magtiayong drug suspects.

Malampuson ang operasyon apan dili maayo ang resulta kay nisamot kawala ang pagsalig sa katawhan kanila kay usa sa mga operatiba ang gireklamong milugos sa 15 anyos nga anak sa magtiayon.

Sa mata sa mga nagpakabuta-bungol nga katilingban makaingon sila nga ‘mirisi’ sa magtiayon. Apan “mirisi” pud ba ang nahitabo sa ilang anak?

Pila na man kaha ka mga anti-drug operations sukad tuig 2016 ang gitumban sa kapolisan ang tawhanong katungod sa mga suspek ug sa ilang mga kabanay?

Sa bag-ohay lang nga survey sa opinion sa publiko, migawas nga nagkadaghan  ang nawad-ag pagsalig sa kapolisan dala niining ilang pamaagi sa pagpatuman sa ‘war on drugs’ ni Pres. Duterte. Daghan sa mga durugista ang gituohang biktima sa extra-judicial killings apan giinsister nga lehitimo ang operasyon.

Sagad sa mga tiyabaw ug bakho sa mga pamilya wa pamatia ug gibiay-biayan pa gyud sila sa mga tawong nakalimot na sa moralidad. Kinsa man gud ang motuo sa mga suspek ug sa ilang mga kabanay?

Ang nahitabo sa Manila, nadugangan ang kahiubos sa katawhan ngadto sa ilang kapolisan.

Apan maayo nga aduna pay pipila ka lugas sa kapolisan ang nagpakita og propesyonalismo ug nagpakamatinud-anon sa pagkapolis.

Nahatagan og gamay nga paglaom ang 15 anyos kay may mga opisyal sa kapolisan nga kombinsidong tinuod ang reklamo bisan paman sa panghimakak sa maong polis.

Ang publiko padayong naghandom nga mosanay pa ang mga maayo ug tarong nga mga polis nga andam paglutos  ug manalipod sa katawhan batok  sa ilang mga kaubang nagabusar sa katungdanan.