Nikalit lang og kalami ang kapolisan. Human sa dul-an sa usa ka buwan nga pagpakahilom sa masaker sa bukirang barangay sa Malubog sa Dakbayan sa Sugbo, nikalit lang sila og katabian. Kaadlawon sa Oktubre 4 nahitabo ang pagpamusil sa lima ka lalaki apan Nobiyembre 1 na nga nakahunahuna pagbutyag ang kapolisan sa dagan sa ilang imbestigasyon.
Nagpaabot ba lang ang mga imbestigador sa tukmang higayon?
Maong giatol sa Kalagkalag ang pahibawo?
O daghan lang gyud sila og trabaho ug karon pa makahigayon? O tingali kay nagung-ong nang imbestigasyon sa Senado?
* * *
Bisan unsa pay hinungdan, naabtan si Senior Superintendent Royina Garma, hepe sa Cebu City Police Office (CCPO), og 27 ka adlaw una nakataho nga:
• Usa sa mga patay’ng lawas may lama sa pulbora (nga, sa tinarung nga imbestigasyon, mahibaw-an sud lang sa tulo ka adlaw);
• May serial number ang usa sa mga armas sa dapit nga nahitaboan (nga, sa kasarangang pakisusi, makit-an sa adlaw sa pagpamusil); ug
• May mga transaksiyon sa drugas sa text messages sa nakuhang mobile phones (nga, sa matinud-anong pakisayod, matino sud lang sa usa ka semana).
* * *
Nipasumbingay hinuon si Garma nga wa sila mangiyugpos sa niaging upat ka semana sa insidente nga posibleng mamahimong sentro sa mga pangutana sa mga senador kon mahinayon ang ilang imbestigasyon sa sunudsunod nga pagpamatay sa Sugbo.
Matud ni Garma ilang nasubay ang armas nga may serial number nga iya sa usa ka opisyal sa gobiyerno apan napasa sa laing tawo atol sa insidente sa Dakbayan sa Talisay sa niaging buwan.
Wa siyang kapasabot nganong wa pay ginganlan nga mga ngan hangtod karon.
* * *
Ang masaker sa Malubog makahuloganon sa bisan unsang imbestigasyon sa extrajudicial killings kay mao ray insidente nga dunay di lang usa kon dili duha gyud ka survivors nga pulos nangangkon nga mga polis ang nidakop, nitanggong ug nisuway pagpatay nila.
Mapuslanon ang imbestigasyon sa Senado kay, bisan kon wa gihapoy matumbok nga mga responsable, mapugos ang kapolisan pagtubag sa mga pangutana, nga hagbay rang gipangutana sa mga tagtungod ug sa mabuot nga mga Sugbuanon, apan gibungul-bungolan lang sa kapolisan kay di man mga senador nga maoy mosubli sa ilang puntil ug promosyon ang nangutana.
* * *