Delicadeza

Delicadeza, pulong nga nagkahulogan og kadungganan sa tawo. Kini masukod ug makita pinaagi sa kinaiya sa tawo pinasubay sa tradisyon ug moralidad sa katilingban.

Alang sa katiguwangan, ang delicadeza importante ug way kantidad sa bahandi nga katumbas niini. Alang nila ang mapasanginlan nga walay delicadeza maoy labing sakit nga insulto sa ilang pagkatawo labi pa kun ang namasangil labaw pa’ng salawayon ug way delicadeza. Gani sa ubang dapit kinabuhi maoy bugti sa ilang dungog.

Si Kongresista Ramon “Red” Durano VI sa ika-lima nga distrito sa lalawigan sa Sugbo gikutlo sa report nga misaway sa iyang kaubang kongresista nga si Gwen Garcia sa ika-tulo nga distrito tungod sa pagpapili niini isip gobernador sa Sugbo sa umaabot nga eleksiyon.

Giakusahan niya si Garcia nga way delicadeza tungod sa tinguha niini nga mobalik isip gobernador bisan kun duna siyay kaso. Gikwestiyon niya ang motibo ni Garcia sa tinguha  niini nga makabalik sa pwesto diha sa Kapitolyo.

Apan daw sa nakalimot si Kongresista Durano sa pagpanamin sa iyang kaugalingon kun ang hisgutanan mao ang delicadeza. Hilas nga paminawon alang sa usa ka politikong sama niya ang  maghisgot og delicadeza tungod kay ambot og duna bay usa nila nga nagbaton niini.

Nalimot ba si Durano sa pagkalambigit sa iyang pangalan sa kontrobersiyal nga “Fertilizer Fund Scam” panahon ni kanhi presidente Gloria Macapagal Arroyo? Angayan siyang pahinumduman sa P5 milyones nga didto niya itugyan sa iyang igsuon nga si kanhi kongresista Ace Durano niadtong 2004.

Usa siya sa daghang mga kongresista sa nasud nga gikwestiyon sa Commission on Audit giunsa nila paggamit ang pundo ug nganong didto ihatag sa ilang mga kadugo ang kwarta inay nga adto sa mga mag-uuma.

Atong ibalik ang pangutana ngadto ni Durano, hain man sab ang iyang delicadeza? Unsa man say buot niyang balikan sa Kongreso nganong buot man siya magpapili pag-usab?

Katungod ni bisan kinsang molupyo sa nasud ang pagpapili og katungdanan sa gobyerno. Usa kini sa mga katungod nga gigarantiyahan sa atong Batakang Balaud. Mao man gani nga bisan gilumotan na ang ubang mga inutil nga politiko sa pwesto ug wala gyuy nahimo aron mapalambo ang ilang dapit nagsigi pa gihapon sila og papili.