Nisibaw na og sugod ang mga pangutana, unsa ka seryuso ang gobiyerno sa kampanya batok sa ilegal nga drugas?
Igo na ba nga sukdanan sa ka seryuso sa gobiyerno ang gidaghanon sa mga napatay sa kampanya?
Igo ba nga sukaranan aron motuo ang katawhan nga seryuso si Presidente Rodrigo Duterte sa iyang kampanya tungod kay gibulgar ang listahan sa mga politiko nga giingong nagprotehir sa mga durugista?
Sa dili pa ta hingpit nga motuo nga tinud-anay ang kampanya ug dili lang ni moro-moro, kinahanglang puy-an sa presidente ang iyang mga pulong.
Unsaon niya pagkumbinsir ang publiko nga tinud-anay ang iyang kampanya kun ang mga tawo nga dunay dakung tulubagon sa pagkatap sa drugas iyang padayong gihangop sa iyang administrasyon?
Pipila sa maong mga tawo mao sila si kanhi Customs Commissioner Nicanor Faeldon ug Isidro Lapeña.
Atol sa pagdumala nila ni Faeldon ug Lapeña sa Customs nilusot ang binilyon ka pesos nga kantidad sa drug shipment.
Apan nganong daw sa giduphan sila sa presidente? Sa kaso ni Lapeña nga niinsister nga way sud nga shabu ang mga magnetic lifters nga giingon sa Philippine Drug Enforcement Agency nga maoy gisudlan sa gibanabanang P11 bilyones nga kantidad sa shabu, gidapigan siya ni Duterte taliwa sa pag-insister ni PDEA Director General Aaron Aquino.
Dihang nakumbinsir nga duna gyuy shabu nga nakalusot, gitangtang man tuod sa Customs apan gihatagan og mas taas nga pwesto isip pangulo sa Technical Education and Skills Development Authority nga dunay ranggo nga Cabinet Secretary.
Unsay impression nga gihatag niini ngadto sa publiko? Gigantihan ni Duterte si Lapeña tungod sa iyang pagmika sa pwesto hinungdan nga nakalusot ang binilyon nga kantidad sa shabu.
Hangtud karon way motuo nga way siyay kalibutan sa maong drug shipment labi pa nga una niya ning gidepensahan bisan sa pag-insister sa usa sa iyang mga deputies nga duna gyuy sud ang maong mga magnetic lifters.
Nalimtan na ba ni Duterte ang lain niyang saad nga bisan dyutay nga honghong sa kurapsiyon dili niya palabyon ug iyang taktakon sa pwesto ang hingtungdan?
Ang pagbalhin kang Lapeña ngadto sa TESDA dili maisip nga silot kun dili ganti!