Kun ikaw ang pabut-on, unsa man ang imong pilion, ang sakto o ang kaayo? Ang tubag niining maong pangutana magdepende kun si kinsa ang nitubag.
Kun ang nitubag politiko nga namolitika mas pilion niya ang kaayo kay sa sakto. Apan kun ang nitubag dili politiko mas pilion niya ang sakto.
Nahuna-hunaan nako kining maong pangutana tungod sa nahitabo nga pagdahili sa yuta sa Dakbayan sa Naga diin daghan ang nalubong nga buhi.
Alang sa kasayuran sa tanan, ang uban sa mga natabunan sa yuta ug namatay, mga informal settlers sa dapit.
Buot ipasabot, gawas sa mga nagpuyo sa ubos nga bahin sa bukid, dili na sila ang tag-iya sa yuta diin nagbarug ang ilang balay tungod kay nabayran na sila sa quarry operators.
Gipapahawa na ang mga informal settlers kay nabayran na apan giduphan sila sa mayor kaniadto sa Naga kay siya namolitika.
Ang maong mayor niangkon usab nga wala niya tumana ang rekomendasyon sa Mines and Geosciences Bureau (MGB) nga papahawaon ang mga nagpuyo sa dapit tungod sa kapeligro na niini gumikan kay naluoy siya nila ug tungod sa politika. Ang maong mayor nagbasol sa iyang gihimo.
Kun gipili pa unta sa mayor ang sakto ug dili ang iyang kaayo, seguro wala o dili kaayo daghan ang nalubong buhi sa yuta nga nidahili sa Dakbayan sa Naga.
Sa mga politiko dili gyud unta ipatigbabaw ang politika aron dili makompromiso ang pagpili sa sakto. Magsilbi unta nga leksyon sa mga politiko ang trahedya sa Naga.
Sa Dakbayan sa Sugbo, duha ka barangay ang nakitaan og mga nangliki nga yuta nga mao ang Buhisan ug Busay.
Ang MGB nisusi na sa nangliki nga yuta ug ako manghinaut nga kun unsa man ang mahimong rekomendasyon sa nahisgutang ahensiya tumanon kini sa mga politiko.
Pilion unta nila ang sakto ug dili ang ilang kaayo.