Bahad sa gisakitang voters

Dugay na kining isyuha nga gisumbong ngari nako sa suod nakong higala, kinsa anaa magpuyo sa usa ka subdibisyon, diin ilang silingan, usa ka public servant.

Matud niya, dinha kunoy higayon nga na-ospital ilang silingan tungod sa delikadong sakit, diin tungod sa kadugayng estar sa ospital, nahutdan intawog pangbayad ang pamilya para sa ospital.

Niduol ang pamilya sa ilang silingang public servant, kinsa nitambag nga paadtoon lang sila didto sa iyang pampublikong buhatan.

Tuod man, niadtog sayo ang anak sa masakiton aron kuhaon ang hinabang pinansiyal. Apan naunsa ba, nga gihatagan man lang og P100 sa public servant ang tagtungod?

Naamang intawon ang pobre. Naping-it ang ngabil ug wala mapugngi ang pagpangahulog sa mga luha samtang wala makasabot sa iyang gibati.

Wala makatuo ang tagtungod nga P100 ray itunol sa maong public servant. Gani, ang naplite sa taksi nga maoy iyang gisakyan ganena, sobra man sa P100. Basta, nipauli  na lang ang tagtungod nga masub-anon ug nibahad nga kon molansar man ang maong politiko og hataas nga pangatungdanan sa gobiyerno, mangampaniya gyud silag maayo nga dili pabotaran ang maong politiko tungod sa tinipigang bati nga kinaiya niini, nga nikulit sa pamilya og masakit nga kasinatian sa ilang kasingkasing.

Nakaila ko sa maong politiko. Ligdong siya, buotan, Diosnon ug dili kurap. Mao nga alanganin kong mogakos sa maong negatibong impormasyon. Apan mas nakaila ko sa tinuorayng kinaiya sa suod kong higala, kinsa maoy niestorya nako niini. Tarung nga pagkatawo si Engr. (akong tawag niya) ug dili kaantigong mamakak. Hinungdan nga nakapangtuana ko, tinuorayng hitabo gyud kaha ang gisugid sa tagtungod ngadtong engineer? Or, nasayop lang si engineer sa pag-relay niini ngari nako?

Niining adlaw nga naka-file nag COC ang maong politiko para sa May 2019 election, dinhi akong masuta, kun kinsay nagsulti sa tinuod? Ingkasog mabalitaan nako nga nangampanya ang pamilya sa tagtungod batok sa milansar nga politiko, igo na kining makatumbok nga tinuod gyod diay ang istorya nga gipaambit ni engineer.

Perog dili? Aw, silay namakak! Or, sa hilom gihilot sa politiko ang maong isyu aron dili na maukab ang baba sa mga tagtungod niining nag-aso-aso nang bugno sa politika.