EDITORYAL - Juvenile Justice Law

Daghan na ang nanawagan ilabi na sa habig sa law enforcement units nga amendahan ang Juvenile Justice and Welfare Act of 2006 nga gipangamahanan kaniadto ni Senador Francis “Kiko” Pangilinan.

Angay klaruhon nga way sala si Pangilinan sa pagsuwat niini nga balaod kaniadto kay para gyud kini sa kaayohan ug proteksyon sa kabataan nga dili sila maabusaran ug aron mahatagan pa og ikaduhang kahigayonan aron magbag-o.

Ang maong balaod nagdili sa pagpasaka og kasong kriminal sa mga batang nag-edad og 15 anyos paubos, bisan rape o pagpatay pa ang ilang nahimong salaod.

Kini ang gibasol kon nganong nidaghan ang mga batang nalambigit sa krimen ug gigamit sila sa mga sindikato sa illegal nga drugas.

Apan posibleng nakahimo sila og krimen tungod kay wala silay kapilian kay kuwang sila og pagatiman sa ilang mga ginikanan ilabi na niadtong gikan sa kabus nga pamilya.

Subo lang nga mas nabaniog ang mga nahimong kasal-anan sa mga kabataan apan wala hatagi og gibug-aton kadtong mga naluwas ug nagbag-o tungod sa maong balaod.

Si kanhi Special Assistant to the President Christopher “Bong” Go’s kinsa mikandidato sa pagka senador sa 2019 mid-term elections miingon nga usa kini sa angay nga unahong amendahan.

Ang mga kriminal mangita man gyud pirme og mga buslot sa balaod aron makalahutay ug usa kining balaora ang ilang giabusaran.

Dunay mga tinguhang paubsan pa gyud ang age of criminal liability sa mga kabataan ngadto sa 9-anyos apan unsa may matabang niini sa sitwasyon?

Posibleng naa pay mga probisyon sa maong balaod nga wa pa hingpit naimplimentar. Unsa naman diay ang papel sa mga ginikanan ngadto sa ilang mga anak nga nakasala?

Maayong tun-an kini og maayo ug dili lang basta ipiton ang kabataan tungod lang kay gigamit sila sa mga criminal kay malagmit ang mga kabataang nagamit sa krimen mga biktima lang sa sitwasyon ug dili ang tanan ilang tinuyoan.