Tinguha ron sa Philippine Drug Enforcement Agency kon PDEA nga ipaubos sa mandatory drug test ang tanang kandidato sa umaabot nga eleksiyon.
Ang lakang ni PDEA director general Aaron Aquino nakakuha ni og suporta sa kapolisan.
Ang hepe sa kapolisaN sa nasud nga si Director General Oscar Albayalde mimando sa iyang mga field commanders nga abagan ang PDEA sa pagpatuman niini.
Ang hepe sa kapolisan dinhi sa Central Visayas nga si Chief Supt. Debold Sinas buot nga ipublikar gyud ang resulta sa drug test aron masayod ang publiko.
Ang sugyot sa PDEA agi ni og suporta sa kampanya ni Presidente Rodrigo Duterte batok sa illegal nga drugas.
Alang nako makiangayon ang maong sugyot.
Tinuod wala ni malakip sa mga requirements nga gisitar sa Batakang Balaod apan nagtuo ko nga way kandidato nga mobalibad niini.
Kini tungod kay ang pagbalibad sa drug test maghatag og negatibo nga imahen sa usa ka kandidato nga posibleng makaapekto sa iyang kahigayonan pagdaog.
Ang wala nako damha mao ang baruganan sa Malakanyang sa maong sugyot.
Ang tigpamaba sa Malakanyang nga si Salvador Panelo miingon nga illegal ang maong sugyot.
Matud niya wala ni itugot sa Constitution. Si Panelo miingon nga kon duna may drug test sa mga kandidato angayang himuon ni nga voluntary ug dili pinugsanay.
Samtang husto si Panelo apan di gyud kapugngan nga daghan ang mangyam-id sa baruganan sa Palasyo niini.
Mogawas man gud nga hipokrito ang mga opisyal sa Malakanyang tungod kay kun silang mga politiko ang apektado dali kaayo silang magpalaban sa balaud.
Ang kataw-anan kay kon mandatory drug test sa mga politiko illegal apan kon patyon ang gidudahan palang nga nalambigit sa drugas daw sa way balaud nga gisubay.
Ambot og nakaayon ba ang presidente sa giyawyaw sa iyang tigpamaba.