Usa sa labing dakong buslot sa kasaysayan sa Sugbo mao ang taras sa atong katiguwangan sa pag-asoy sa ilang kasinatian pinaagi sa sulti lang. Ambot di ba lang sila ganahan nga mosuwat, o mga dahon ug panit sa kahoy ra ang ilang gisuwatan, wa tay kasayuran unsay nahitabo sa Sugbo human nibiya si Antonio Pigafetta niadtong May 1, 1521 hangtod nga niabot si Miguel Lopez de Legazpi niadtong Abril 27, 1565.
Gikabalak-an nga niliwat sa taras sa kalimtanon ang nisunod nga mga henerasyon sa mga Sugbuanon. Maong nawani gihapon ta sa bag-ong mga libro sa nasudnong kasaysayan.
* * *
Mao nga nahinangop ko sa paglusad sa libro mahitungod ni Cebu Archbishop Emeritus Ricardo Cardinal Vidal atol sa unang anibersaryo sa iyang kamatayon niadtong Huwebes. Kay kon way magtagad sa pagsuwat mahimong makalimtan ra ang talagsaon niyang mga nahimo sa dul-an sa tulo ka dekada nga pagduma sa labing dakong artsidyosesis sa nasud.
May libro nang nasuwat mahitungod niya samtang buhi pa si Kardinal Vidal. Lahi ang bag-ong gilusad nga libro kay gawas nga wa pa masuwat ang katawhan kansang mga kinabuhi iyang nahikap ang gipalihug sa pagpuno sa mga pahina.
* * *
Ang ideya sa malungtaron nga pagpasidungog sa talagsaong kinabuhi ni Kardinal Vidal niturok sa panghunahuna ni Kongresista Raul del Mar sa amihanang distrito sa Dakbayan sa Sugbo samtang gihaya ang patay’ng lawas sa gikamingawan nga prinsipe sa Simbahan.
Gihangop sa kadagkoan sa artsidyosesis ang iyang sugyot. Apan sama ni del Mar naglibog sila unsaon pagsugod. Ang paglusad sa ideya sa libro ni Kardinal Vidal maoy labing maayong sinugdanan.
* * *
Duha ang posibleng dangatan ning maong proyekto: Magmingaw ang mga tigpasiugda ug mapugos sa pagpangita og laing paagi sa pagsuwat sa libro; o bahaan sila sa mga tampo nga mapugos sa pagpili sa labing talagsaong mga sugilanon. Masaligon ko nga di usikan sa mga Sugbuanon ang kahigayonan pagsugid sa bililhong mga pagtulon-an nga gibilin ni Kardinal Vidal nila.
Usa ka tuig ang lugway sa pagtigom sa mga sugilanon sa Binisaya, Iningles ug Tinagalog. Mahimong i-email ang mga sugilanon uban ni Kardinal Vidal sa cardinal.vidal.stories@gmail.com. Mahimo sang motawag sa 2534222 alang sa dugang kasayuran.