Makabungog nga kahilom

Sud na sa pila ka semana nga wala moatubang si Mayor Tomas Osmeña sa inadlaw niyang press conference sa City Hall.

Di ginhapon ang makabungol niya nga pagpakahilom taliwa sa daghang dagko nga panghitabo sa Dakbayan sa Sugbo. Nagsugod ang takwahaw niya nga pagdumili nga ma-interview sa media human siya gibaharan ni Presidente Rodrigo Duterte nga tamparoson.

Nahitabo ang bahad taliwa sa di maayo niyang relasyon sa kapolisan. Ug sa hulga niya batok sa kapolisan nga dili na mobayad ang dakbayan sa rehistro sa mga sakyanan ug pagputol sa uban pang ayuda tungod sa kapakyas sa kapolisan pagsumpo sa mga kaso sa patay.

Akong klarohon nga samtang dunay hulga gikan sa mayor apan wala ni niya ipatuman. Hangtud karon padayong gipahimuslan sa kapolisan sa dakbayan sa Sugbo ang tanang suporta gikan sa kagamhanan sa dakbayan.

Pero tataw nga lahi ang impormasyon nga miabot sa dunggan sa presidente. Ambot kinsay nagpahaba? Usa lang ka butang ang klaro, gilupig si Osmeña sa sinipsipay sa presidente mao nga aron paglikay nga moabot sa sitwasyon nga dili na niya makontrolar ang kasuko ni Duterte, napugos ang mayor sa pagpakahilom hangtud nga mahilot niya ang presidente.

Makatabang niya ang pagpakahilom una ug likayan nga makiglantugi sa kapolisan. Nakaamgo si Osmeña nga di sa tanang higayon siya maoy hari ug masunod. Apan angayang magbantay ang mga kaatbang niya sa politika tungod kay inigbali sa hangin posibleng mas bangis nga mayor ang ilang ikaatubang.

 * * *

Tinguha ‘ron sa Senado nga imbestigahan ang sunod-sunod nga patay dinhi sa Sugbo. Ang mga sakop sa minoriya sa Senado pinangulohan ni Franklin Drilon miingon nga nabalaka sila sa grabing patay dinhi sa Sugbo.

Way lalis nga makapabalaka ang nanghitabong patay dinhi sa Sugbo apan dili imbestigasyon sa Senado ang gikinahanglan aron pagbadlong niini.

Tataw nga ilang gikabay-an ang isyu alang sa libreng publicity sanglit nagsing-abot man ang eleksiyon.

Ang angayan nilang tutukan mao nga kon unsaon nga maminusan ang gipas-ang kalisud sa publiko nunot sa grabing pagsaka sa presyo sa mga nag-unang produkto tungod sa inflation.