Martial Law walay kaluoy

Dili na ko makatumbok sa hustong petsa. Pero  dili mahitabo nga makalimot ko niadtong gibuhat sa mga polis ngari namong mananagat panahon sa Martial Law, diin among nasinati nga wala gyuy kasingkasing ang Martial Law nga maminaw og katarongan sa mga kabos, kinsa nagpakabuhi sa kahayag.

Sanglit menus na ang barungoy didto sa kalawran  sa among lungsod sa Balamban, miabot mig pamarungoy  sa kadagatan sa Tuburan, diin tungod sa kalayo kon mouli pa kami sa among dapit, nakahukom ming  adto na lang modunggo sa baybayon sa Tuburan kada human namo’g panagat.

Ang sinaog nga mga pumpboat maoy gihimo namong katulganan magabii. Ang ibabaw’ng bahin sa mga katig nga haklapag mga langkay maoy among atop,  samtang ang bas gibaniga’g sako sa harina nga maoy among higdaan.

Dinhay gabii nga miulan.  Mao kadto nga ang grupo namo nakahukom nga adto na lang mangatulog sa bakanteng manggaran sa merkado sa Tuburan.  Mga alas 11:30 pa kadto sa gabii. Abli pang tindahan og pan. Mihapit mi aron mokaon.

Sus, naunsa ba, nga wala pa gani mo-siren ang curfew sa  ika alas 12:00 sa tungang gabii, pangdakpon bitaw mi sa mga polis, haskang pakiluoy namo. Among gipakita sa mga polis ang gidala namong habol ug mipahayag nga padulong na ming matulog sa merkado, pero nangaon lag kadiyot. Busa, mihangyo mi nga dili lang unta dakpon.

Apan walay dunggan ang mga polis. Walay mata nga nakakita sa kamatinud-anon sa among pagpakaluoy. Sirado  ilang kasingkasing. Walay gugma sa ilang isig ka tawo. Aw, gipriso gyud mi tanan tibuok gabii! Pagkabuntag, gipalimpyo mi sa kinatibuk-ang nataran sa munisipyo, gitupiha’g ‘Stay at Home’ haircut ug udto na ming gibuhian.

Maong nakaingon ko nga ang Martial Law ni anhing Ferdinand Marcos walay kaluoy. Gidakop man gani ming mga mananagat lang. Unsa na kaha kadtong mga bokal kaayong tawo batok sa diktadora niyang pangagamhanan?

So, no wonder, gipasirad-an ang mga publishing ug estasyonan sa radyo’g telebisyon. Gipangdakop ug gipahilom ang kusog mokyawkyaw batok sa iyang pamaagi. Hasta mga pari, wala tahora ang gisul-ob nilang puting sotana. Kalit lang nahanaw sa simbahan ug walay makasubay kon hain na kaha sila tagoi hangtod karon?