EDITORYAL - Leksyon sa kaminyoon

Dili tanang nakaminyo og langyaw moresulta sa maayong kinabuhi. Hinuon daghan man ang nagmalampuson gumikan sa pagsinabtanay sa magtiayon apan aduna say uban nga wala palari sa ilang kaminyoon.

Tungod sa kalisod sa kahimtang dinhi sa Pilipinas ilabi na sa mga hilit nga mga lugar ang makaminyo og langyaw usa sa mga paspas nga solusyon aron makalingkawas sa kakabus.

Ang mga langyaw wala kaayo masuhito sa kinaiyang Pilipino. Makugang na lang sila nga human sa ilang kasal otomatikong ma-miyembro sila sa pamilya sa iyang naminyoan ug wala sila masayod kon unsa ka suod ang pamilyang Pilipino.

Kay ang usa ka miyembro sa pamilya nga makaminyo og langyaw dakong garbo para kanila ug makapasalamat pa gani sa swerteng naabot ngadto sa usa sa ilang kabanay. Apan usa sa dakong hagit sa magtiayon mao ang kultura, tradisyon ug bisan na sa pagtuo kay mahimong dili sila magkasinabot sa mga butang ug mga isyu tungod niini.

Sa kaso sa Cebuana nga si Mailyn Sinambong-Aalam kinsa naminyo  sa usa ka prominenteng personalidad sa nasud sa Sweden nga si Steve Abou-Bakri Aalam nahimong urom para sa pamilya sa babaye ang gidangatan niini kay gipatay ang babaye sa iyang bana niadtong Septiyembre 23. Wa pay nakahatag og klarong impormasyon bahin sa motibo sa maong linoog nga pagpatay ug hustisya ang gisinggit karon sa kabanay sa Cebuana.

Way makapugong sa usa ka Pilipino nga maminyo og langyaw, bisan ang gobiyerno dili makapahunong niini.

Apan mas maayong suhitohon una og maayo ang gustong minyoan ug tan-awon ang kaugalingon kon unsay kaugmaon nga nagpaabot kon kini ilang pakaslan.

Kon maminyo man, langyaw o kaparehas nga Pilipino mas maayong di kalimtan ang panultihon sa mga katiguwangan nga: “Ang kaminyoon dili sama sa kan-on nga kon mapaso mahimo rang iluwa.”