Olive oil mas maayo kaysa Viagra (2)

Tambag pa ni Dr. Chrysohoon, ang malungtaron nga mamintin ang kahimsog o kabaskog sa pagka-lalake diha sa sexual nga kombati, mas maayo ang olive oil kay sa viagra nga temporaryo lang ang epekto ini, nga kadugayan mosamot na hinuon ang kasagmuyo, nga igo na lang sa pagpanglingo-lingo nga di na gyud kahimo.

Gawas sa viagra, daghan pang mga hinungdan nga magkaluya sa sex hangtud mahimo na lang nga dekorasyon nga dili na diay motusik.

Sama sa medikasyon nga gimintin ang sakit sa kasingkasing, ug sa mga tambal sa high blood, nga ang naglabing side effect ini mao ang pagkaparalisar sa gahum sa pakig-sex.

Gitambagan ang mga lalake nga mahilig sa butter, mas maayo maoy ihulip ang olive oil, labi na og apilan og mga prutas, nuts, isda ug mga utanon, kay mao kini ang suplay nga enerhiya alang sa lahutay o malungtaron nga pakigkombati sa sex.

Nga sugniban sa kanunay, painiton ang kahigwaos nga tugkaron ang kinalaliman.

Sagad sa nag-diet sa Mediterranean, gawas  nga padaghanon o pahimsogon ang mga bihod (testosterone), paus-oson usab ang naghinobrang kabug-at sa lawas, nga usa sab sa naglabing nakapahinay nga daling maugtas sa hinamagay, nga dili pa gani kasikad nidungoy na ang mga tuhod, nga lugosay na makahandos.

Ang extra virgin olive, nga giproseso sa bugnaw (cold process), kinuha (extracted) kini gikan sa pinulpog nga bunga sa olive, ang pili-a nga maoy konsumohon, kay nagbaton pa kini og mga nutrients nga dasok sa bitamina ug minerales.

Labing maayo kini nga ‘cooking oil’ nga ipaagi lang nga paghiran lang sa olive oil sa linuto o sinugba nga isda o isagol sa init-init pa nga potahe.

Apan kon kini gamiton sa pagprito o ‘i-deep fry’ kini sa sobrang kainit, dili sab kini makaayo kay mangawala na ang mga gikinahanglang nutrients niini.