Nganong karon lang

Nag-atubang ug nag-istorya ang duha ka kanhi Senador sa nasud nga sila si kanhi Senate President Juan Ponce Enrile ug Ferdinand “Bongbong” Marcos. Gihisgutan sa duha sa ilang panag-istorya ang mga panghitabo panahon sa pamunoan sa amahan ni Bongbong nga si kanhi Presidente Ferdinand Edralin Marcos diin si Enrile ang Defense Minister ug tigpatuman sa Martial Law nga gipatuman niadtong panahona.

Sa ilang pagkukabildo nahisgutan sa duha ang mga panghitabo sa pamunoan ni Presidente Marcos nga nahimo nang tipik sa kasaysayan sa nasud. Klaro ug tin-aw sa mga mata sa nagtan-aw ang motibo sa duha nga nag-istorya, gusto nilang usbon ang kasaysayan sa nasud ug ipaila ang ilang kaugalingon nga bag-ong mga historian sa nasud.

Si Enrile misulti kang Bongbong nga wala kuno siya mobiya ni Presidente Marcos sa iyang pag-adto sa EDSA kun dili gusto lang kuno niyang ibulgar ang giporma nga Military Junta. Apan ang kasaysayan nga gipamatud-an sa mga video footages nga nakuha sa iyang pag-adto sa EDSA aron sa pagpakigkita ni Fidel Valdez Ramos, iyang giingon nga mibiya siya ni Marcos tungod kay dili na makaya sa iyang konsensya ang mga binuhatan ni Marcos ug iyang gituhoan nga nanikas kini sa eleksiyon.

Si Enrile misugilon ni Bongbong nga dili tinuod nga daghang nahimong mga kalapasan sa tawhanong katungod ang pamunoan ni Marcos. Apan si Marcos gipabayad sa hukmanan og minilyon tungod sa paglapas sa tawhanong katungod sa katawhan panahon sa iyang pamunoan. Kuyawa no!

Nganong karon man lang kini himoa ni Enrile ug Bongbong? Tungod kay para kanila mao na kini ang tukmang panahon. Nakita man gud sa duha nga wala na kaayo kasayuran ang mga bag-ong tubo sa kasaysayan sa nasud maong ila kining gisakyan.

Maoy ilang gi-target sa ilang kukabildo ang mga bag-ong tubo kay minus kini og kahibalo sa kasaysayan busa dali nga malingla ug dili ang mga guwang na nga lisud na nilang ilaron.