Olive oil mas maayo kaysa Viagra (1)

Kini matud pa sa sugyot sa mga siyentipiko, nga ang olive oil mas maayo nga mopatuyhakaw sa gana sa pakighilawas aron makalahutay sa hamag sa kama, nga walay sayd-epek, di sama sa Viagra di pa kahunat luyloy na.

Ang pagtuon nga gilangkuban sa 600 ka lalake, nadiskubrehan nila nga kadtong nakakonsumo og daghan nga olive oil,  menus ang nakasinati og problema sa ilang kombati nga seksuwal, nga sagad pulos nakatugkad sa himaya nga mapagarbuhon.

Sa mga pagdukiduki ini, nga ang dasok nga diyeta sa olive oil, mopahawan sa pinong kaugatan aron hamugaway modagayday ang sirkulasyon sa dugo nga makaabot sa tanang ‘organ’ o parte sa atong lawas nga nagdala sa mga gikinahanglang nutrens, apil na ini ang pagana sa seks.

Kadtong nikonsumo ini nga labing menus siyam ka kutsara sa 1ka semana, menus ang nag-antus sa kaluyahon sa paghilawas kaysa diotay o wala mokonsumo og olive oil. Ug ang mahiligon  sa olive oil, makapataas sa lebel sa testosterone, nga maoy responsable sa pagpagana nga molahutay sa seks nga matagbawon.

Ang olive oil, kabahin kini sa ginganlan og ‘Mediterranean diet’, nga dasok sa prutas, bungahoy, isda, nuts ug olive oil, nga kini maoy mga nutrens nga mosanta sa 40% nga pagkainutil sa seksuwal nga kombati, sumala sa nadiskubrehan sa mga pagdukiduki didto sa Gresya (Greece)

Usa sa nanguna sa ‘research‘, si Dr. Christina Chrysohoon, gikan sa University of Athens, nagrekomendar nga ang kanunay nga pagsagop sa ‘lifestyle’ sa diyeta nga Mediterranean, inubanan sa pag-ehersisyo, adunay dakong kaayohan sa kaugatan sa kasingkasing.

Apil na niini ang kaabunda sa kapasidad sa paghilawas, mahamtong man o maedaran na.