Krus nga akong pas-anon

Dako kaayo ang akong pagtuo sa Kahitas-an paghatag kanako niining kinabuhia, kining ubos nga alagad sa Ginoo, bisan sa akong pagka makasasala. Duna siyay bug-at nga rason.  Mao kini ang nakadugang sa kahulogan sa akong kinabuhi bisan pa og grabe kalisod. Ang krus nga kinahanglan nakong pas-anon giisip ko na lang nga gasa nga akong gipas-an kay gipagaan kini sa akong lawom nga pagtuo, dedikasyon ug pagsalig sa Magbubuhat. Ako ning gipas-an nga puno sa pagbati.

Alang ni Dodong, akong gikonsiderar nga ang krus sama sa usa ka orasan nga nagpahinumdom sa kalisod ug kalipay sa akong kinabuhi. Kini maoy nagpaluha, nagpakatawa kanako.  Sama kini sa lampara nga naghatag og kahayag sa akong agianan aron mapalig-on pa og maayo ang akong pagtuo bisan pa sa mga pagsuway nga akong nasugatan.  Sama kini sa ganghaan nga mosira ug motapos sa pisikal nga kasakit nga kinahanglan nakong antoson, apan mobukas usab aron akong makita ang bag-ong kahayag ug mga posibilidad sa akong kinabuhi.

Sa buhi pa ang akong inahan nga si Mama Pining, aktibo siya sa nagkalalain-laing charity works, religious activities ug uban pa, dihay usa ka higayon nga gisultihan ko niya niini: “Dodong, your Lolo Juan, my father was the one responsible for bringing the image of the Santo Cristo de Limpia in the Basilica del Santo Niño from Spain”.  Si Lolo Juan uban sa mga paring Agustino maoy nagsugod sa Tridium alang sa tinuig nga pangilin  matag bulan sa Septiyembre nga saulogon namo isip usa ka pamilya hangtud karon.  Bisan pa sa pagtaliwan sa akong anak nga si Jacqueline sa miaging tuig ug ang daghang ginbuhaton sa unibersidad ug  wala na hinuon kami nakapreparar, gipaniguro gihapon namo nga makapamisa para niini. Ang imahe mahimong mabisita diha sa walang bahin sa Basilica hangtud karon.

Subay sa tinuig nga pangilin, kaming duha sa akong kapikas nga si Nena maoy nanaad nga moduaw gyud sa Blessed Virgin in Lindogon, Simala kada tuig.

Bug-at sa among mga kasingkasing ang pagtaliwan sa among Papa Inting niadtong dekada 70 ug ni Mama Pining niadtong 1984.  Mao kadto ang adlaw nga diin kaming manag-igsuon, ako, Inday Sering ug Eddie nakaamgo nga dakong kawad-on  kanamo ang ilang pagtaliwan. Amo silang gipangga ug ang ilang mga handumanan naitanom na sa among mga kasingkasing.

Ang akong igsuong si Eddie nga gobernador sa Sugbo anang panahona ug ako maoy mopas-an aron pagpadayon sa legasiya sa among mga ginikanan ug kini ang pagpadagan sa unibersidad. Di nako makalimtan sa dihang nagsugod ko isip “janitor” sa legasiya ni Papa Inting ug isip “sulogoon” ni Mama Pining sa iyang mga buhat pagka-deboto sa Kahitas-an ug ni Mama Mary.

Bisan pa man niining krus nga gipas-an, nagpasalamat gihapon ko sa Kahitas-an kay bulahan gihapon ako nga nakaangkon og mapinanggaon ug lig-ong tigpaluyo nga mao ang akong asawang si Nena sa adlaw-adlaw nakong mga ginbuhaton. Sa pagsawop sa adlaw, gibati ko og katagbawan.

Kon itugot sa Kahitas-an, andam pa akong modawat og dugang krus nga pas-anon. Mga krus nga nagsimbolo sa Iyang gugma  ug walay paglubad nga pagsalig kang Blessed Virgin Mary.