Wa bahini sa kabilin ang ubang igsuon

Dear Atty. Divine:

Ang akong mga ginikanan nangamatay na og duna silay gibilin nga yuta nga 600 square meters nga anaa nahimutang ang among karaan nga balay. Pito mi ka magsuon apan nakurat na lang mi kay ang titulo sa maong property nakapangan na man sa among ikatulo nga igsuon kay matud niya base sa balaod siya ang legal owner sa lot. Ang akong sister miingon sab nga sa dihang bata pa mi nakadungog daw siya ni papa nga miingon ngadto sa akong igsuon nga “ please take care of the lot” kay siya man gud ang maayo og trabaho that time. Ang akong pangutana kon unsa may gibasihan sa among igsuon sa pag-claim sa maong property nga wa  man mi niya bahini? Unsaon namo pagkuha ang among share? Ang mga apo mamahimo pa ba sab nga makabahin ani? Daghang salamat. — Mrs. D.

* * *

Dear Mrs. D

Base sa atong balaod kon ang property gipanag-iya gani sa mga ginikanan ug sila patay na, ang mga anak maoy ilang compulsory heirs. Buot ipasabot nga ang mga anak maka-inherit gyud in equal share sa property nga gibilin sa mga ginikanan ug way bisan usa kanila nga mahikawan. Ang pag-angkon sa imong igsuon sa tibuok property ug pagbalhin niini ngadto sa iyang pangan way legal basis bisan pa kon giingnan siya nga maoy moatiman sa property. Gawas lang kon iyang napalit ang maong property gikan sa inyong mga ginikanan sa dihang sila buhi pa ug angay sab kini niyang iprobar. Busa ang maayo ninyong buhaton mao ang pagpasaka og reklamo batok sa imong igsuon ngadto sa barangay diin mahimutang ang property . Kon di mo ma-settle sa barangay then you will file a case against your brother in court ug inyong pangayoon ang Judicial Partition but kinahanglan nga aduna moy ebidensya sab nga ikapresentar nga ang maong property  gipanag-iya sa inyong mga ginikanan pinaagi sa  pagpakita sa previous title and tax declarations ug uban pang dokumento. Samtang ang mga apo, maka-inherit lang by representation kon pananglit ang ilang ginikanan nga anak sa original owner nangamatay na so sila ang mo-represent sa share niini. Thanks and God bless. — Atty. Divine

* * *

Alang sa inyong pangutana, ipadala kang sa Legal  Corner sa Banat News  sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.