Kun maningil na ang kinaiyahan

Dakong trahedya ang nasinati sa daghang pamilya sa Sitio Sindulan, Barangay Tinaan, Dakbayan sa Naga human midahili ang yuta nga giingong tipik sa gimina sa usa ka kompaniya og semento sa maong lugar.

Ang pagdahili mugna kini sa sigeng ulan-ulan. Ang mga tawo wala makapangandam tungod sa kakulang sa warning gikan sa mga opisina sa gobiyerno, ilabi na gikan sa kagamhanang lokal sa Dakbayan sa Naga.

Ang Mines and Geo-Sciences Bureau, pinaagi sa labaw sa Finance and Administrative Division nga si Atty. Gerardo Mahusay, mi-certify niadtong Agosto 29, 2018 nga ang nakitang mga liki-liki sa yuta sa maong lugar dili mugna sa pag-quarry sa kompaniya sa semento, kun dili natural lang nga talan-awon.

Si Atty. Mahusay miingon sa iyang sulat ngadto kang Mayor Kristine Chiong nga walay angayang kabalak-an ang mga komunidad sa palibot sa maong lugar ang pagpangliki sa yuta.

Apan kagahapon sa sayo kaayong kabuntagon, gipukaw kita sa makaguol nga balita nga ang bukid sa Barangay Tinaan milihok ug mitabon sa kabalayan.

Ang Office of the Civil Defense mipadangat gilayon og mga rescuers aron maugkat ang mga tawo nga nangatabunan uban sa ilang mga panimalay. Adunay daghang mga bata nga naapil sa natabunan.

Hangtod sa pagsulat ning atong Tikdol, nag-abot-abot ang mga rescuers gikan sa nagkalainlaing lungsod, siyudad sa Sugbo, ug mga pribadong grupo aron motabang sa pagpangita sa mga natabunan sa pagdahili.

Hagit karon ni Mayor Chiong ang pagtan-aw sa ubang mga quarry sites diha sa Dakbayan sa Naga. Atong nasayran nga hilabihang kadaghang nag-quarry sa maong lugar.

Usa sa laing estorya nga angayang tubagon sa mayor mao ang pasangil nga ang mga molupyo sa Sitio Sindulan angayan na diay untang i-relocate tungod kay nag-ungaw na sa kakuyaw ang ilang pagpuyo mugna sa nagka-opaw nang kabukiran tungod sa pagmina.

Apan ambot nganong wala kini ma-relocate gilayon. Paminawon nato unya ang tubag sa mayor niini.

Dili lang sa Dakbayan sa Naga ang grabe nga quarry. Sa Lungsod sa Minglanilla, ilabi na sa may Manduang ug Cuanos, grabe ang quarry diha nga giingong adunay espesyal nga permit gikan sa opisina ni Gobernador Junjun Davide.

Usa ka kapitan sa Minglanilla ang nag-asoy nako nga ang quarrying sa maong mga lugar sa Minglanilla adunay “blessing” sa mga opisyal. Kinsang mga opisyala, wala sad klaroha.

Apan ang ako lang, kanang nahitabo karon sa Barangay Tinaan maayong panaminan sa ubang mga lungsod nga nag-quarry aron undangon na kini mentras wala pay trahedyang nanghitabo nga mokalas og kinabuhi sa mga tawo.

Ang kinaiyahan na gani ang maningil, ang mga pordoy ra ba gyuy mahimong makaluluoy.

Maayo lang unta og kadtong mga kurakot nga opisyal ang matabunan sa landslide.