Mga piniriso daw ilaga na lang

Ang kinabuhi sa tawo usa ra. Dapat ampingan! Pero, unsay gibuhat sa uban? Giusik-usikan lang.  Naghikog kay nagtuo nga ang kamatayon maoy sulbad sa iyang dakung suliran. Nalimot nga ang pagbuhat sa ingon, dili mao ang katapusan sa pag-antus, kun dili sinugdanan sa walay katapusang kasakit sa sunod ug forever nga kinabuhi nga mao ang impiyerno – ang dapit nga giandam sa Ginoo alang sa mipatay sa kaugalingon, o sa mipatay sa iyang isig ka tawo.

Walay katungod ang tawo sa pagkutlo sa kinabuhi kay ang Ginoo maoy tag-iya niini. Busa, Siya ra sab ang may katungod sa pagbawi sa hinulaman ta nga kinabuhi. Nga sa ato pa, ang hinanaling kamatayon nga tinuyo sa tawo usa ka dakung sala. Ug daku kaayo niya kining tulubagon sa higayon nga moatubang na siya sa atong Maghuhukom aron hukman.

Usa kanhi ka Pit Officer, mahigugmaon kaayo sa kinabuhi. Ultimong kinabuhi sa mga mananap iyang gimahal. Usa kadto ka higayon, gikan sa panggabiing trabaho, pagpadulong nila’g pamauli, nakaagi’g pilapilan ang kotse nga ilang gisakyan. Naigking ang drayber nga naa sa iyang tupad sanglit mikalit man siyag siyagit-badlong: “Pare, brake!!! Brake!!! Kay naay mga baki nga nanglabang, oh, basig maligsan!”

Haskang hugyawa’g katawa sa kaubang nanakay. Kay walay magtuo nga ingon adto diay ka manggiluy-on ang kasingkasing ni Boy. Di pareha sa mga riding-in-tandem nga nauso ning atong henerasyon karon nga kinabuhi gyud sa tawo ang ilang atngan ug walay kukalooy mopaulan sa mga makalilisang nga bala sa kamatayon.

Ambot pipila na kaha ka piniriso nga bag-o lang gipagawas sa prisohan, pero pag-abot sa unahan gitirahan-patay sa mga nagtaptap nga anino? Ambot pipila na kaha ka mga dinakpan nga padulong nang motambong og husay sa korte apan wala na makapadayon kay gibanhigan-patay sa mga nagbonet nga mamumuno? 

Mitiyabaw ang simbahan. Mipalanug sa ilang kahingawa: “Wala na ba diay luna ang mga makasasala nga mabuhi aron magbag-o sa ilang kinabuhi?” Hinungdan, nga mitagik silag Oratio Imperata ug  gipangadye kada tapos sa misa. Kini tungod kay nalooy sila sa mga piniriso, kinsa daw mga ilaga na lang, diin inig gula sa ilang lungag, patyon sa nag-atang nga mga iring.