Mabuhi ang demokrasya

Sugod karong adlawa saulogon sa mga sakop sa media dinhi sa Sugbo ang “Press Freedom Week.”

Sulod sa usa ka semana ihiklin ang kompetisyon ug ipatigbabaw ang panaghiusa pinaagi sa nagkadaiyang mga kalihukan nga gitumong pagpalambo sa demokrasya ug pagprotehir sa sagradong katungod sa gawasnong pagpadayag.

Ika-26 na karon ka tuig sukad namugna ang maong kasaulogan. Ug salamat sa kahago ug paningkamot sa mga haligi sa industriya sa media sa Sugbo niining talagsaon nga kabilin.

Sila maoy tinuod nga kampeyon sa kawsa pagpanalipod sa atong kagawasan isip mga sakop sa ika-upat nga estado.

Kasagaran nila pabilin pang aktibo sa industriya apan dunay uban nga mitaliwan na. Mangahas ko paghingalan sa mga tawong nagbudlay aron mamugna kining tinuig nga kasaulogan. Usa nila ang mitaliwan na nga si kanhi Press Secretary Cerge M. Remonde.

Siya uban sa mga haligi sa media sa Sugbo sama nilang Atty. Pachico Seares, Super Bobby Nalzaro, ug Atty. Jane Paredes ang akong mahinumduman nga nagmatuto aron molipang ug molambo kining maong selebrasyon matag tuig.

Matag tuig lainlain ang mangulo sa kasaulogan ug karong tuiga ang nagsilbing lead convenor mao ang Cebu Daily News.

***

Sukad kaniadto hangtud karon nagpabilin ug mas midaghan pa ang mga hadla ug hulga sa gawasnong pagpadayag.

Atubangan sa paglambo sa teknolohiya nahulga nga mamahimong irrelevant ang media isip bugtong tinubdan sa kasayuran.

Laing hagit nga giatubang sa media mao ang pagtumaw sa gihulagway nga “alternative truth” sa mga tigpakuyanap sa sayop nga impormasyon diha sa social media.

Naa usab ang hulga sa pagpug-ok sa kamatuoran pinaagi sa pagpanghadlok ug sa pagpanghulga sa mga tighatud sa kasayuran.

Apan luyo sa tanang hulga pabiling dasig ug usa sa labing gawasnon ang media dinhi sa Sugbo.  Mabuhi ang mga sakop sa media sa Sugbo ug mabuhi ang demokrasya!