Nagmaya ang katawhang Pilipinhon ilabi na gyud kitang mga bisdak sa kalamposan ni Margielyn Didal sa paglangkat sa bulawang medalya sa skateboarding atol sa Asian Games 2018 didto sa Jakarta, Indonesia.
Mainiton nga gihangop si Margielyn sa mga Sugboanon atol sa iyang pagbalik niadtong Martes diin sa airport pa lang nag-atang nang daan ang iyang mga supporters.
Gimotorkada siya hangtod na sa Dakbayan sa Sugbo diin gihatagan siya og heroes’ welcome sa iyang eskuylahan sa Baranggay Lahug.
Dihang nahinabi nako ang Asian Games gold medalist, daw naglutaw pa siya sa hangin sa kalipay.
Apan matud niya nga nagtoo na gyud siyang daan nga makuha niya ang bulawang medalya sa wala siya moadto sa Indonesia, gipaagi niya sa komedya nga advance kuno siyang ‘mag isip’ kon sa tinagalog pa.
Epektibo kini tungod kay natinuod man ang iyang gihunahuna. Labaw sa tanan ang inspirasyon niya mao ang paghaw-as sa kalisod sa iyang pamilya.
Kabus ang pamilyang Didal nga nagsalig lang sa ilang yanong panginabuhi isip mamaligyaay og “finger foods” atubangan sa simbahan.
Apan wala kini mahimong babag sa pagkab- ot sa iyang pangandoy bisan og gidid-an siya niini kaniadto sa iyang mga ginikanan sa skateboarding.
Padayon siyang nagbansay bisan og madakpan sila kaniadto kay mag-ensayo lagi sa mga dapit nga dili kuno pwede. Si Margielyn ang unang Sugboanon nga nakahatag og dakong dungog sa skateboarding ug labaw sa tanan labing unang Filipino nga nakahatag og bulawang medalya sa Asian Games sa maong sport.
Ang maong kalamposan nagbukas sa kahigayonan sa uban nga mosunod sa iyang tunob.
Maayo unta nga ang kainit sa suporta sa mga opisyal kang Margielyn mosilaob pa aron daghan ang madasig tungod kay anaa na may suporta gikan sa lokal nga kagamhanan.
Sunod target ni Didal ang Olympics nga posible gyud niyang makab-ot tungod sa iyang katakos ug determinasyon.