Nangita gyud og gubot

Sa ikaduhang higayon, giputol na usab ni Mayor Tomas Osmeña ang suporta sa kagamhanan sa siyudad sa Sugbo ngadto sa lokal nga kapolisan.

Giklaro na gyud sa mayor: “We are drawing the line.” Ang maintenance sa mga sakyanan sa kapolisan dili na manginlabot ang kagamhanang lokal.

Gihimong rason sa mayor ang pangangkon ni Police Regional Office-7 Director Debold Sinas nga malinawon ang Sugbo. Kini, sumala pa sa mayor, bisan sa mga insidente sa pagpamatay nga daghan niini nanghitabo sa Metro Cebu.

Ikaduhang higayon na kini gihimo sa mayor sa siyudad. Una na niyang giputlan sa suporta ang kapolisan sa dihang wala ihatag sa Philippine National Police ang iyang gusto nga ibilin isip PRO-7 director niadtong 2016 si Patrocinio Comendador ug si Benjamin Santos sa Cebu City Police Office.

Daghang mga armas nga iya sa kagamhanan sa siyudad nga gibawi pinaagi sa memo sa mayor ug gibawi usab ang mga incentives sa kapolisan. Miresulta kini sa pagbawi sa National Police Commission sa gahum ni Tomas ngadto sa lokal nga kapolisan.

Dili ba kaha masuko og samot si Pres. Rody Duterte ning pagsungag na usab ni Tomas sa kapolisan?

Miulbo ang kaspa sa mayor sa dihang gipasaka gyud ang kasong murder ug frustrated murder batok sa iyang bata-bata nga si kanhi kapitan Jessielou Cadungog sa Tejero.

Kini human gipusil sa bodyguard ni Cadungog nga si William Macaslang si PO3 Eugene Calumba, nga matud sa kapolisan igo lang nag-surveillance sa Tejero.

Miinsister ang mayor ug si Cadungog nga si PO3 Calumba usa ka “assassin.” Apan ang kapolisan miingon nga wala kini pruweba.

Mao ba kini nasuk-an sa mayor? Kon tinuod nga self-defense lang ang gihimo ni Cadungog, ang korte na ang mohukom niini.

Busa dili maayong sawayon ang mga awtoridad kon ipasaka ang kaso batok ni Cadungog. Busa dili angayan supakon ug but-an ang kapolisan unsay ilang mandato.

Si Cadungog naa sa drug watchlist. Dugay na ba diay kini siyang gibantayan sa kapolisan? Unsa man gyuy mensahe niining paglaban ni Tomas kang Cadungog?

Si Cadungog mismo miangkon nga iyaha ang armas nga bitbit ni SPO1 Adonis Dumpit atol sa shootout nga gikamatay niini didto sa Bohol. Si Dumpit bodyguard ni Tomas kaniadto.

Unya si Dumpit nahibaw-an sa National Bureau of Investigation sa Bohol nga nalambigit na sa drugas. Ug gikapuyo ni SPO1 Dumpit ang usa ka biyuda kang kansang bana druglord nga napatay sa kapolisan.

Kon mahibaw-an ni Duterte kining pakig-away ni Tomas sa kapolisan, dili ba kaha kini siya suspensohon nalang gyud hinuon? Daghang kaso giatubang sa mayor. Pulos kini nagtangag og suspensiyon.

Aw, mas maayo nalang sad nang masuspenso kay sa tumbahon.