Kontra gusto

Bisan giunsa og pakaaron-ingnon ni kanhi Cebu City mayor Michael Rama nga andam siyang magsakripisyo tungod ug alang sa panaghiusa sa oposisyon dinhi sa dakbayan, molutaw gyud ang naghingapin niya nga ambisyon nga mobalik sa pwesto.

Niadtong Miyerkules miatubang pag-usab si Rama sa media uban ang iyang mga kaalyado sa oposisyon aron ipahibawo nga andam na siyang magsakripisyo. Matud niya talikdan ang iyang tinguha nga magpapili og usab pagkamayor sunod tuig kun kabubut-on kuno sa katawhan nga si Vice Mayor Edgardo Labella maoy himoong kandidato.

Ang pangutana unsa may taksanan nga basihan ni Rama aron siya makumbinsir nga si Labella ug dili siya maoy gusto sa iyang mga kauban sa partido nga mamahimong standard bearer sa oposisyon? Ang pagbutang man gud niya og kondisyon aron mosugot nga si Labella maoy himoon nilang kandidato pagkamayor nagpakita ni nga napugos lang siya ug dili kinasingkasing ang iyang hukom.

Nagkahulogan sab ni nga posibleng na-pressure siya sa iyang mga kauban sa partido. Usa ka kasaligan kaayong tinubdan mitug-an nga dugay na gisigihan og hangyo si Rama sa iyang mga kauban nga ihatag kang Labella ang posisyon.

Kini tungod kay alang sa mga kauban ni Rama mas dunay kahigayonan si Labella nga modaog batok sa higante nga si Mayor Tomas Osmeña taliwa sa pasangil nga ang kanhi mayor protektor sa ilegal nga drugas.

Gani sigun sa tinubdan miabot gyud sa sininghagay ang usa sa ilang mga tigom dihang ilang nahisgutan ang maong isyu tungod kay dili gyud mosugot si Rama. Kun moinsister si Rama dako ang purohan nga siya mag-inusara tungod kay hapit tanan niyang mga kauban sakop man sa PDP-Laban.

Mao nga sa mosugot siya ug sa dili, hayan si Labella maoy mamahimong opisyal nga kandidato sa oposisyon pagkamayor. Gawas lang kun mobuwag siya sa grupo ug mangita og laing mga kauban nga kandidato. Pero ang dakong pangutana, kinsa may mouban niya?