Natural nga remedyo sa nikupos nga lagos

Daghang hinungdan ngano nga ang atong lagos, mohiyos, o nikupos nga halos makita na ang nakaugsok nga mga ugat sa ngipon nga mora’g naugtas ang lagos nga nanghawid aron makatabang nga molig-on ang ngipon. Indikasyon kini sa mahimong problema nga magkasakit sa lagos.

Kon nakasinati ka na niining problemaha, makatabang ang pagbasa sa pipila ka kasayuran mahitungod sa pamaaging natural nga pag-alibyo, aron mahibalik ang kahimsog sa lagos. Dili basta ibaliwala nato kining kasoha, kay daghan sab ang mahimong komplikasyon nga ikamatay kon magrabehan kita niini.

Unsa man gyu’y naglabing hinungdan niini? Atong sundan ang mga mosunod nga sagad maoy gitumbok nga pagkadaot sa atong lagos. May posibilidad nga sakit kini sa lagos apan mahimo sab nga may laing hinungdan, sama sa;

Periodontal diseases – nagpasabot nga ang lagos naimpeksyon sa bakterya. Mosangpot kini sa kadaot, nga sagad mangluag ang mga ngipon kay niyusyos na man ang lagos, nga makita na ang mga gamot sa ngipon.

Kulang sa paglimpyo (oral hygiene) – kon ganahan lang, ug dili regular manglimpyo sa baba, sa lagos, alingagngagan, dila (dinhi magpundo ang mga bakterya), manutbras, o manghingiki gamit ang hilo (dental floss), diin nanuksok, o namilit nga nahimong tartar (calculos) nga pinuy-anan sa bakterya nga mokutkot sa ngipon ug modaot sa lagos.

Grabeng nakakuskos, o nakabagnos sa tutbras -  Labi na’g gahion, o nanuskig na ang ‘bristle’, usahay mangasamad ang lagos nga manghubag hangtud maimpekted. Ang kaundanon (collagen) sa lagos mohiyos, monipis kini nga nagkahilis, nga nakatapot na lang sa apapangig ang mga ngipon. (Sumpayan)