Drug mule sa mga bilanggoan

Usa ka bayot ang nasakpan nga mopayuhot unta og mga nubain ampules sulod sa Cebu City Jail kaniadtong Martes.

Apan napakyas siya dihang nabantayan nga dunay niugdo ug nisiwil sa iyang sampot.

Gidala siya sa Guadalupe Police Station diin didto na niya napagawas ang butang nga diha sulod sa iyang sampot, ang condom nga naay sulod nga mga ampules sa nubain.

Dinhi nato makita nga ang mga durugista mobuhat gyud sa tanan aron lang makapalusot og kontrabando diha sa bilanggoan.

Kaniadto ang mga babaye nga dalaw ra man ang sagad nato mabalitaan nga madakpan kay naay gisuksok nga kontrabando sa ilang kinatawo.

Tungod kay bistado na man ang modus, posibleng ang mga lalaki na usab karon ang gigamit nila sa pagpalusot og drugas.

Gani posibleng dugay na kining gihimo nila apan nakatutok lang ang mga guwardiya sa kababayen-an.

Kon wala ko masayop, ang mga babaye ra man ang pabilangkaron sa mga babayeng jailguard, apan ang mga lalaki pahuboon ra sa sapot ug dili patuwaron aron makita kon may gisuksok ba nga kontrabando sa ilang lubot.

Ma babaye, bayot, o lalaki mahimo gyud nga makapalusot og drugas gamit ang ilang lawas, basta bugtian og kuwarta.

Posible gani nga tunlon daan sa mga dalaw ang drugas nga gisulod na daan sa usa ka butang nga maigo sa ilang tilaok ug ikalibang nila sa pansayan sulod sa bilanggoan.

Mao kini ang gihimo sa mga drug mule nga kanunay masakpan sa airport tungod kay makita man sa X-ray machine.

Dili kini layo nga nahitabo na sa mga bilanggoan, apan ang pangutana karon, unsaon man pagkahibalo sa mga jailguards ang ingon niini nga modus nga wala may kahimanan ang Bureau of Jail Management and Penology?