EDITORYAL - Nahadlok nga banhigan

Pipila sa mga binilanggo sa Cebu City Jail nahadlok na karon nga motambong sa husay sa ilang mga kaso sa hukmanan kay basin og banhigan sama sa nahitabo sa tulo ka piniriso sa dakbayan sa Talisay. Sagad sa maong mga piniriso nga nagkurog na karon sa kahadlok ug nagtuo nga may nagtinguha gyud nga mopatay kanila, pulos nag-atubang og kaso nga naglambigit og drugas.

Ang ilang kabanayan midangop kang Konsehal Dave Tumulak nga maoy deputy mayor for police matters sa dakbayan sa Sugbo. Aron mahanaw ang kahadlok sa mga binilanggo nga sila banhigan sa mga nagdumot kanila, giawhag ni Tumulak ang kapolisan nga magdestino og mga polis sa mga karsada nga agianan sa mga binilanggo paingon sa korte.

Kanindot kon ingon usab niini ang gibati karon sa ubang mga tigpayuhot og gidiling drugas, ug mahadlok na unta sila nga mopadayon sa ilegal nilang kalihokan. Dili imposible nga may mga tawo gyud nga nagtinguha nga patyon kadtong mga binilanggo nga bisan og anaa na sila sa bilanggoan, apan nagpadayon gihapon sa ilang negosyo pinaagi sa modernong kahimanan.

Kadtong mga tawo nga wala pa gyud batia og kahadlok, bisan pa og gipangpatay na ang mga susama kanila og negosyo, dili magmahay nga moabot ra ang adlaw nga para kanila. Bisan pa og destinohan pa’g mga polis ang agianan sa mga binilanggo gikan sa bilanggoan ug paingon sa hukmanan, may pamaagi pa gihapon kon tinguhaon gyud nga sila pamatyon.

Sagad gud sa mga binilanggo nga nakagawas na gikan sa bilanggoan, wala sila magbag-o sa ilang kinabuhi, ug gipadayon nila ang ilang pagka daotan, mao nga may mga tawo nga mikontra gyud sa ilegal nga drugas nga wala na makaagwanta ug sila gipangtodas.