Dear Atty. Divine,
Ang akong husband nakakuha og Divorce decree sa US kay American citizen man siya.
Nagminyo na gani siya og usab. Wala mi anak attorney, ug milungtad gyud og 10 years ang among kaminyuon.
Karon naa na sab ko’y live-in partner nga foreigner, ug gusto unta mi nga magpakasal.
Ang akong pangutana kon pwede na ba ko nga magpakasal pag-usab after ko gi-divorce sa akong bana? Daghang salamat.- Gina
* * *
Hi Gina,
Dili pa ka pwede nga magminyo bisan pa kon duna nay Divorce decree ang imong kanhi bana, kay kinahanglan pa nimo kining ipa-recognized sa atong korte.
Ang atong Family Code nagkanayon nga kon ang Filipino citizen maminyo og foreigner, ug unya makakuha og divorce decree ang foreigner sa iyang nasud, then ang Filipino spouse mahimo na usab nga makaminyo.
Apan dili kini automatic kay kinahanglan pa nga mo-file og Petition for Recognition of Divorce Decree ang Pinoy sa korte sa Pilipinas, ug kon ma-recognized na ang Divorce decree una pa siya pwede nga makaminyo pag-usab. Thanks and God bless.- Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.