EDITORYAL - Ayaw kahadlok sa hulga

Nagduhaduha na karon si Mabolo Barangay Captain Niña Mabatid kon modayon pa ba siya paglansar isip presidente sa Association of Barangay Councils (ABC) kay kuno may hulga batok kaniya ug iyang anak kon ihinayon niya ang iyang plano.

Kon tinuod man ang pangangkon ni Kapitan Mabatid nga nakadawat siya og hulga, ug giingong apil pa ang iyang pamilya, makaingon kita nga hugaw na gyud kaayo ang pamaagi nga gigamit sa pipila ka tawo aron lang pagsiguro og kadaogan.

Hinoon, daghan ang nagtuo nga pagpanghadlok ra kini sa ubang mga tawo nga walay lingaw nga posibleng mga dumadapig sa ikaatbang ni Kapitan Mabatid nga mao si Kapitan Franklin Ong sa Barangay Kasambagan.

Abtik hinoon kaayo nga nanghimakak si Kapitan Ong og bisan unsa nga kalambigitan sa giingong pagpanghulga ni Kapitan Mabatid. Iyang gitataw nga imposible nga siya manghulga nga mayoriya man sila nga kaalyado sa mayor.

Alang kang Kapitan Mabatid nga nangangkong suportado siya ni Presidente Duterte, dili maayong motalaw siya ug mosibog tungod lang sa mga pagpanghulga.

Kinahanglang barugan ni Kapitan Mabatid nga siya lig-on ug takus nga makadumala sa grupo sa mga kapitan sa barangay kon siya maoy suportahan sa kinabag-ang mga kapitan.

Ang sangka nila ni Kapitan Mabatid ug Kapitan Ong, maisip nga bugno sa duha ka higante kay gihulagway sila nga parehong mga kwartahan.

Apan nakabentaha si Kapitan Ong kay suportado siya ni Mayor Tomas Osmeña nga aktibo usab kaayo nga nanginlabot aron gyud ang iyang manok maoy makadaog.