EDITORYAL - Bawos kay wa botari?

Ang pagpahigayon og turnover ceremony usa sa mga importanteng kalihokan sa panerbisyo publiko ilabi na sa mga elected officials. Kay dinhi makita kon unsa ka propesyonal ug kaligdong ang usa ka lider bisan pa man sa kapildihan.

Apil usab niini ang pagduso og kompletong imbentaryo sa tanang mga gamit sa buhatan nga ilang ipasa sa mosunod nga opisyales. Pamaagi usab kini batok kurapsyon.

Apan sa usa ka balita dinhi sa Banat News nga pwerteng kurata sa mga bag-ong opisyales sa Barangay Day-as sa Dakbayan sa Sugbo sa unang adlaw sa ilang paglingkod niadtong Hunyo 30 sa udto.

Kay gawas nga way mipakita bisan anino sa mga opisyales nga ilang pulihan wa sab silay naabtan nga butang bisan lamesa o lingkoranan diha sa barangay hall. Hain naman diay napunta ang mga gamit sa maong barangay hall?

Kon mao ni, ang mga mipuli nga barangay opisyales magsugod sa wala. Walay nasayod kon asa napadulong ang maong mga gamit.  Unsa man ni, bawos ni kay wala sila botari sa milabay nga piniliay?

Posible nga ang ubang mga butang diha sa barangay personal nga gamit sa mga barangay opisyal o barangay workers  apan tingali kadto rang mga sama sa baso, kutsara, coffee mug ug ginagmay nga gamit.

Unsa ba diay ni, sa pipila ka tuig nga paglingkod sa mga opisyales diha sa pwesto personal nilang mga gamit ang ilang gidala diha sa barangay hall aron gamiton sa ilang pagserbisyo? Pagkabuotan gud diay nilang tanan.

Apan hain naman diay napunta ang ilang bahin sa Internal Revenue Allotment (IRA) ug financial assistance gikan sa siyudad sa nanglabay nga katuigan, bisan usa ka lusok nga lingkoranan wala sila makapalit?

Nasayran sa Banat News nga dili lang ang maong barangay ang nahitaboan niini kay duna say usa ka barangay sa habagatang bahin sa siyudad ang ingon ani gihapon ang gibuhat sa mga opisyales nga tingali di kadawat sa kapildihan.