Sketch ang mayo

Nakadayeg ko sa akong informer sa usa ka lungsod sa amihanang Sugbo kay misanong dayon siya sa akong awhag nga mangayo ko og sketch sa nahimutangan sa mga ilegalista nga ilang nahibaw-an.

Ari lang ninyo ipadala sa Banat News, eskina D. Jakosalem ug V. Gullas Street, Dakbayan sa Sugbo, kay aron ma-compile nako ug ako dayon nga ikatugyan sa atong kadagkoan sa kapolisan.

Dinhi sa Dakbayan sa Sugbo, naghuot nagpusot-pusot ang mga report. Dili na ko motug-an pa kon unsa kini nga report. Salamat kaayo sa inyong pag-kooperar nga masanta ang mga ilegal sa inyong dapit.

Balikon nako, mas malipay ko kon makapadala unta mo og sketch, pananglit sa balay sa drug pusher, sa balay nga gihimong operation center sa illegal swertres, sa mga balay nga gibutangan og mga video karera ug moli-moli.

Pagka karon, mo-limit lang usa ko dinhi sa mga dapit sa Sugbo, kay wala pa ko’y mga kontak nga kapolisan diha sa silingan nato nga rehiyon. Labi na gyud unta kon may report kamo kabahin sa mga tigpayuhot og drugas diha sa atong mga bilanggoan, nindot gyud kaayo.

Ayaw kalimot, ang numero nga inyong teksan mao ang 0943-0766611.

* * *

Hapit na gyud ang ting-uwan, apan wala pa gyud mahaw-asi sa mga lapok ang mga “dikes” nga gihimo sa kagamhanan sa siyudad sa Sugbo diha sa kabukiran.

Ang maong mga dikes, gitawag ni Mayor Tomas Osmeña og mga “gabion dam” nga gitumong aron nga ang tubig gikan sa kabukiran, mapundo usa sa dam ug dili dayon direkta nga moagos sa kinaubsan.

Inigkapuno na sa dam ug tubig, anha pa nga higayona nga moagos kini ngadto sa kinaubsan. Kaniadto, may mga higayon nga sa dili pa gani mapuno sa tubig ang dam, motuang na ang uwan.

Karon kay ang mga dam nga gitukod kaniadto napuno na man sa mga lapok, ang tubig direkta na nga moagos sa kinaubsan.

Mao kini ang rason nga ang mga dapit nga nahimutang sa lupa nga bahin sa dakbayan, makasinati gyud og paglunop kon may kusog nga uwan.

* * *

Sukad sa pagkahuman sa gihimong sapa nga nagsubay sa dalan Colon, wala pa gayud makasinati ang dakbayan og kusog nga uwan.

Gusto unta ko nga mobunok ang kusog nga uwan kay aron mahibaw-an nato kon epektibo ba ang gihimo nga sapa sa DPWH aron pagsulbad sa paglunop diri sa downtown area sa dakbayan.

Pero, usbon ko, wala gyud ko motuo nga ang maong sapa nga gigastohan og kapin sa P50 milyones sa kagamhanan, hingpit nga makasulbad sa paglunop kon mag-uwan.