Maayo pa og motago mo

Kon tinuod man ang gitug-an sa akong amigo, angay’ng motago na lang gyud kadtong mga polis nga nalambigit sa ilegal nga drugas, aron nga dili sila maanam-anam sa pagkatiklo.

Wala ba kamo makabantay nga sagad sa mga gipangtiklo nga polis giingon nga nalambigit sa ilegal nga drugas? Mahimo nga ang uban kanila, wala gyud mamatud-i nga sad-an kay wala may motestigos batok kanila.

Tuohan nako ang gisulti sa akong amigo nga adunay grupo sa mga tawo nga gitahasan karon sa paghipos niining mga badlongon nga sakop sa kapolisan.

Kaniadto, usa nako sa informer, mipadala kanako og kompleto nga inpormasyon kabahin sa kabuang sa kapolisan nga nadestino sa usa ka siyudad.

Gani, ang giilang lider sa mao nga kapolisan nga kakonsabo sa usa ka giilang drug lord nga gitug-an kanako sa akong informer, wala na karon madestino sa Sugbo kay tua na gilabay sa usa ka bahin sa Luzon.

Gilabay siya sa layo nga lugar human nga si Presidente Duterte milingkod na sa iyang pwesto. Kon moabot ang higayon nga ang maong polis maigo sa target, dili na ko mahibulong pa.

Apan tingali, kon ang maong mga polis nga kaniadto nakiglambigit sa mga tigpayuhot og drugas, apan karon nagbag-o na, dako ang akong pagtuo nga sila pasayloon na ug dili na hilabtan sa mga nangita kaniya.

Gitug-anan ko kon kinsa ang nagpaluyo niining pag-hunting sa mga badlongong polis, apan dili ko moingon nga “A-1” na gyud kini nga inpormasyon.

Tambag nako sa mga polis ug ubang tinugyanan sa balaod nga kaniadto nalambigit sa negosyo sa drugas, nga pagbinuotan mo, aron malugwayan pa ang inyong kinabuhi.

Basin og nakalimot kamo sa gisulti ni Presidente Duterte diha nga mihimo kini og pakigpulong sa kadagkoan sa kapolisan sa Police Regional Office-7.

* * *

Salamat kay sa miaging semana, milihok ang kapolisan og gisakmit nila ang ubay-ubay’ng mga video karera ug moli-moli sa Barangay Pasil ug Ermita.

Apan mao lagi, ang akong mga informer mitaho nga paglabay sa pipila ka adlaw, gibalikan ra usab pagbutang ang kabalayan nga didto gisakmit ang mga video karera.

Wala pa’y aksiyon ang Malacañang sa report kabahin sa naghitak nga illegal gambling dinhi sa Sugbo, ilabi na ang illegal swertres, video karera ug moli-moli.

Apan may lain ko nga paagi aron mapugos ang kapolisan sa pagpaspas paghimo’g kampanya. Text mo sa nahimutangan sa mga video karera ug moli-moli, sa ngalan sa tag-iya sa balay, ingon man ang nagpadagan sa illegal swertres.

Ipadala sa hot number nga 0943-0766611 ug paabota ang resulta, ayaw lang hinoon pagdali.