Husto ang gihimo ni Presidential Spokesperson Harry Roque: Nangayo sa pagsabot sa publiko sa laing kasaypanan sa Presidential Communications Operations Office (PCOO) apan giawhag niya ang mga kawani sa pagmatngon sa ilang gimbuhaton aron nga dili madugangan ang ilang pakauwaw.
Kay labihang daghana na sa mga bulilyaso sa PCOO sa niaging duha ka tuig sa pamunoan ni Presidente Rodrigo Duterte, nga makapahibulong nga wa pa’y mga ulo nga nangligid hangtud ning higayona.
Gani, ang ilang pangulo nga si Martin Andanar gitugpo pa sa presidente nga usa sa posibleng mga kandidato pagka senador.
* * *
Sa wa pa tawga sa PCOO og “Norwegia” ang Norway ug sa wa pa nila nganli og “Rogelio” si anhing National Security Adviser Roilo Golez, nanlipaghong sab ang ilang kadagkoan sa nangagi nga kasaypanan:
Gipagawas sa PCOO ang IDs sa mga sakop sa Malacañang Press Corps nga puno sa wa magkadimao nga grammar nga ikauwaw bisan sa ligoy nga mga tinun-an; ug
Ang Philippine News Agency (PNA) nga ubos sa PCOO nigamit sa logo sa Dole Philippines, kompaniya sa pinya, sa ilang balita mahitungod sa Department of Labor and Employment (DOLE).
* * *
Posibleng katin-awan nga wa’y nakatandog, ni nakatul-id, sa PCOO mao ang talagsaon nga kasikit sa ilang kadagkoan ngadto sa Malakanyang. Si Presidente Duterte ang nag-unang tigdupa ni PCOO Assistant Secretary Mocha Uson nga maoy topnotcher sa pagpakatap sa sayop nga kasayuran:
Gibalhin niya ang nahimutangan sa Mayon Volcano gikan sa Albay ngadto sa Naga, ang dakbayan ni Bise Presidente Leni Robredo; ug
Gigamit niyang hulagway ang mga polis sa Honduras sa pag-awhag og pangaliya alang sa atong kasundalohan sa Marawi City.
* * *
Bisan si Roque maglisod og tudlo sa PCOO. Karon lang bag-o, iyang gipahibawo nga wa na’y apil ang Norway (mao nay husto nga spelling) sa sabutsabot sa kalinaw tali sa gobiyerno ug mga komunista.
Apan si Presidential Peace Adviser Jesus Dureza nihulagway sa iyang pahibawo nga bakak ug iresponsable.
Apan sila si Roque, Andanar ug Uson makapanagang nga igo lang nisunod ni Presidente Duterte, kinsa nibalikbalik sa sayop nga ihap nga duha ka polis ang namatay matag adlaw sa kampanya sa drugas ug nibalikas ni Gabby Concepcion inay sa laing Gabby nga iyang gikasuk-an.
* * *