Hangtud karon, wa pa’y makapasabot sa talagsaong katakus ni Sir Julius Poloyapoy sa pag-ayo sa mga masakiton.
Labing kahibulongan, sunod sa kalit nga pagkawagtang sa balatian, mao ang katakus ning kanhi magtutudlo sa agrikultura sa pagkahibawo unsay sakit sa pasyente ug sa pagtultol sa bahin sa iyang lawas nga kinahanglang hikapon.
Kausa, nakakuyog ko og bata nga wa pa sukad makasugat ni Sir Julius, kinsa nihatag niya og manggiuwawon nga pahiyom. Nipiyong si Sir Julius sa iyang mga mata ug nihikap sa tutonlan sa pasyente, nga maoy naghatag og kahasol sa bata ug sa iyang mga ginikanan.
* * *
Bisan dili makigsulti sa mga pasyente, kay kanunay man nga giapas sa panahon tungod sa ilang kadaghan, mora og may mogiya niya sa tukmang bahin sa ilang lawas:
May babayeng gihikap niya duol sa mata kay may kakulian diay sa panan-aw;
May abogadong runner, kinsa niagwanta lang sa iyang piang, nga nakugang nga ang iyang tuhod maoy unang gihikap; ug;
May negosyanteng bag-o pa nga gipahibawo sa mga doktor nga posibleng dunay prostate cancer, gihikap duol sa pantog ug gipasaligan ni Sir Julius nga tipasi pa ang gidak-on sa pagtubo.
* * *
Nitug-an si Sir Julius nako nga may tingog nga mohunghong niya unsay gibati sa mga pasyente ug unsay hinungdan sa ilang sakit.
Ang tingog mohatag niya og mga termino nga dili niya masabtan, apan kon iyang isulti sa mga pasyente makapahupay nila kay mapasabot ang ilang balatian.
Maong hingpit siya nga mopaundayon sa gamhanang puwersa nga mabatyagang mohakop niya human sa tim-os nga pangaliya.
Kasagaran, dili siya makaihap pila na’y iyang nahikap ug makaamgo na lang nga nisangko na sa taas nga linya sa mga pasyente.
* * *
Nagtuo si Sir Julius nga gihimo siyang kahimanan sa wa’y kinutobang kaluoy sa Labaw’ng Makagagahum. Mao nga human nahiagom sa mga pasangil ug pagbugal-bugal, mapasalamaton siya nga nahimong kabahin sa apostolado sa Arsobispo Teofilo Divine Mercy Communities.
* * *
Nia ang schedule sa apostolado: Balamban (ikaduha ug kataposang Lunes); CEBECO II sa Danao (ikaduha ug kataposang Martes); Moalboal (unang Huwebes); 61st St., Happy Valley Subdivision (ikaduha ngadto sa kataposang Huwebes); San Roque Gym atbang sa Cebu Metropolitan Cathedral (matag Sabado); ug Carcar (ikaduha ngadto sa kataposang Domingo). Sa dugang kasayuran, palihug text sa 09213611959.
* * *