Estambay pangdakpon?

Dili tingali tukma nga ang mga tawo nga mag-estambay, deritso na lang nga pangdakpon sa mga polis bisan og wala sila makahimo og salaod. Paminaw nako, “lahap” na sab kaayo kini nga lakang, kana kon wala man maghinubra ang report nga atong nabasahan.

Pananglit, dunay mga tawo nga ang ilang balay nahimutang daplin sa karsada, unya gusto sila nga magpahayahay atubangan sa ilang panimalay uban sa ilang mga silingan, mahimo na diay sila nga dakpon? Dili tingali makiangayon kay wala man sila makahimo og salaod.

Kinahanglan tingali nga ayuhon paghubad kon unsa gyud ang “estambay” nga maoy gustong ipadakop sa hepe sa Philippine National Police (PNP) nga si Director General Oscar Albayalde.

Para kanako, ang “estambay” nga angay’ng pangsikopon mao kanang mga tawo nga bagis, ug mag-inom daplin sa karsada nga kon tan-awon makapahadlok gyud kay ang uban maghukas sa ilang mga sinena ug magpakita sa dagko nilang patik sa lawas.

Apan kon dunay mga tawo nga nagpundok tuod, apan igo lang nga nagsultihanay ug nagkataw-anay, nganong hilabtan man sila? Pagkalisud niining maong kamandoan ni PNP Chief Albayalde. Sigurado ko nga sawayon na usab sila niini sa kadagkoan sa Commission on Human Rights.

Husto si Konsehal Joel Garganera nga misugyot sa kapolisan nga mas nindot kon mokonsulta usa sila sa kadagkoan sa CHR.

* * *

Ang Cebu Doctors Hospital dunay parking area alang sa ilang mga ambulansya, apan gipaparkingan man nila sa mga sakyanan sa mga doktor ug sa mga opisyal sa tambalanan.

Ang resulta, ang ilang ambulansya ug ubang ambulansya nga maghatod og pasyente, anha na lang nila iparking sa karsada, Tungod niini, gi-clamp sa CITOM ang duha ka ambulansya. Unya sad-an diay ang mga traffic enforcer?

Suportahan nako ang CITOM gikan sa pagsaway sa ubang mga tawo nga wala pa kaayo makasabot sa isyu, unya dali kaayo nga nakahimo og kumentaryo.

Apan ang kapolisan sa Waterfront Police Station, dili angay’ng tugotan sa CITOM nga makahimo og parking area atubangan sa ilang police station nga kabahin sa karsada.

Duna may grahe ang maong police station nga anaa sa kilid, apan ambot, bisan unsa na man la’y gibutang diha. Kana unta maoy limpyohan sa mga polis ug gamiton nila nga parking area, dili kay anha sila mag-park sa karsada. Dili ba mga sir?

Kamo ra ba diha sa Waterfront Police gipasagdan ra ninyo ang mga ilegal nga sugal, sama sa video karera, moli-moli ug illegal swertres diha sa Tejero ug Carreta. Mora’g nagdawat gyud mo og payola gikan sa operator niini kay nagkiyugpos ra mo.