Kinahanglan patas

Dako ang kahigayonan nga adunay pagsaka sa sweldo sa mga mamumuo dinhi sa Central Visayas sa dili madugay.

Kini sa diha nga miuyon ang Regional Tripartite Wages and Productivity Board nga angay na gayud nga usbawan ang suholan sa mga minimum wage earner.

Matud pa sa taho dili pa lang dugay, andam ang RTWPB-7 nga moaprobar og usbaw sa sweldo, ug nga mahibaw-an ang mao nga desisyon sa sunod nga panagtigum sa wage board sa umaabot nga mga adlaw.

Sa niagi nga mga bulan, duha ka petisyon ang gipasaka sa mga grupo sa sektor sa mamumuo nga nangayo og dugang usbaw sa inadlaw nga suholan.

Ilang rason mao ang pagsige og pagtaas sa presyo sa mga palaliton karong panahona.

Ila nga gipasanginlan ang implementasyon sa Tax Reform for Acceleration and Inclusion (TRAIN) Law sayo niini nga tuig nga maoy nakaingon sa pagsulbong karon sa presyo sa mga nag-una nga palaliton.

Hinuon, grabe usab nga nakasupak ang sektor sa mga negosyante sa mao nga mga petisyon.

Rason usab nila nga apektado usab sila sa TRAIN Law gumikan kay mimahal na usab ang importasyon ug transportasyon sa ila nga mga produkto.

Bitaw. Klaro usab nga dako og epekto ang mao nga balaod sa business sector kay grabe na man ang pagtaas sa presyo sa lana, ug uban pa nga palaliton, gumikan sa dugang buhis nga gipahamtang sa kagamhanan, dako nga gasto na usab kini sa inadlaw nga operasyon sa mga patigayon.

Apan dili usab nato ikalimod nga mas dako og epekto ang TRAIN Law sa yano nga katawhan.

Nunot niini nga pagtaas sa presyo sa mga paliton, daghan kanila ang dili na halos kaya ang pagpakaon sa ila nga pamilya tungod sa nagkahiyos nga purchasing power sa ila nga inadlaw nga kita.

Hinuon, angay usab nga hunahunaon sa wage board ang epekto sa pagtaas sa sweldo sa labor sector.

Kinahanglan nga tagdon usab sa wage board ang opinyon sa mga mamumuhonan sa pagpakanaog nila og patas nga desisyon.

Wala’y lalis nga angay gayud nga usbawan ang sweldo sa mga mamumuo, apan kinahanglan nga dili usab maagrabyado ang business sector sa unsa man nga pagtaas sa suholan.

Kini aron usab nga dili malugi ang negosyo.