Usa ka suod kaayo nako nga amigo, mitug-an sa rason ngano nga wala gayud motudlo si Mayor Tomas Osmeña og Board of Directors nga magsilbe nga policy-making body sa Cebu City Traffic Operations Management (CITOM).
Base sa akong nahibaw-an, nakaingon ko nga maayo sab nga pamaagi aron nga direkta na nga si Mayor Osmeña maoy makahimo og mga pamaagi sa pagdumala sa trapiko dinhi sa dakbayan. Tinuod man sab, bisan og naa ang CITOM Board, ang mayor man gihapon ang basulon kon makasinati kita og grabeng problema sa trapiko.
Ang mahinungdanon lang diha nga si Isko Ouano nga gitugyanan sa mayor pagdumala sa CITOM, mobuhos gayud sa iyang oras aron sa pagpangita og paagi nga masulbad ang problema sa trapiko sa dakbayan sa Sugbo. Sa ako hinoong pagpaniid, milihok man gyud si Isko Ouano aron mapahapsay ang atong trapiko.
Apan mas nindot gyud unta kon ang mga traffic enforcer mahatagan og gahum nga makasakmit sa lisensya sa mga drayber nga makahimo og kalapasan sa balaod sa transportasyon. Aw tingali, kon mayoriya na ang mga konsehal nga alyado sa Bando Osmeña Pundok-Kauswagan (BOPK) diha sa City Council, mapalabang na gyud nila ang ordinansa.
Karon gud, kuwang og kahadlok ang mga drayber nga madakpan sa mga traffic enforcer kay ang ilang lisensya dili man makuha gikan kanila, kay ang mga CITOM enforcer wala man isyuhi og TOP sa LTO. Ang LTO gud moisyu lang og TOP sa mga regular nga kawani sa gobiyerno.
Unya kay halos tanan man sa mga CITOM enforcer mga kaswal, dili gayud sila mahimong isyuhan og TOP. Maghuwat na lang ta nga mahimo na nga mayoriya ang BOPK diha sa City Council aron maaprobahan na ang dugay na kaayong ordinansahon ni Konsehal Jun Gabuya.
* * *
Ang Police Coordinating and Advisory Council (PCAC) makatabang gyud unta aron molihok pag-ayo ang kapolisan paghimo og operation batok sa mga ilegal nga sugal dinhi sa dakbayan.
Pinaagi sa PCAC, mahimong masangonan nila ang direktor sa kapolisan nga si Senior Superintendent Joel Doria, aron molusad ang iyang mga sakop og paspas nga kampanya batok sa illegal gambling.
Wala malilong sa mga sakop sa PCAC nga midagsang pag-ayo karon ang mga illegal swertres, video karera ug moli-moli gambling machines nga gipasagdan ra sa mga polis.
Apan utro pa nga nagkiyugpos lang ang mga sakop sa PCAC ug mora’g wala’y gihimo sa maong problema. Wala tingali sila masayod nga ubos sa balaod (Republic Act 8551) ang mayor maoy gihatagan og katungod pagsuperbisar sa kampanya batok sa illegal gambling.