Aksyon sa kapolisan gikinahanglan

Makasumpo ba sa krimen ang pagdili sa mga motorista pagsul-ob sa tinted full face helmet, bonnet, ug fask mask?

Dili man siguro makasumpo apan makatabang sa imbestigasyon sa otoridad pag-ila kinsa ang mga kriminal.

In fairness sa kagamhanan sa dakbayan sa Lapu-Lapu higpit na nga gipatuman sugod niadtong Abril 1 ang City Ordinance 206-2009.

Nalatid niini ang pagdili sa paggamit og tinted helmet, ug uban nga mga butang nga makatabon sa nawong. Apan wala man gihapon kini makapakgang sa mga riding-in-tandem sa ilang operasyon pag likidar sa mga tawo.

Dili man gyud malihok tanan sa mga otoridad ang pagpanakop sa mga malapason niining maong ordinansa sanglit limitado ra man usab kaayo ang ilang manpower.

Apan dili man siguro ang helmet maoy dakong isyu kon dili mao ang krimen nga gikinahanglan sulbaron sa atong kapolisan.

Aduna nay ordinansa nga magamit sa kapolisan sa paghimo og lakang nga makapakgang sa krimen.

Aduna nay kamandoan ang mayor alang sa full implementation niini, gani gusto sa mayor nga mohimo og one time big time operation o anti criminality campaign.

Gihatagan na og dugang gahum ang kapolisan sa city government pag-abog sa mga kriminal busa ila unta kining gamiton.

Bisan gani og dili magsul-ob og helmet ang riding- in-tandem kon mopatay sila og tawo mahimo gyud nila kay wala may mga otoridad nga magbantay.

Bag-o lang usa ka lalaki gikan sa hearing sa kaso sa drugas gipusil patay haduol sa eskina sa City hall ug sa headquarter sa kapolisan.

Gikinahanglan ang dugang police visibility kay mag-unsa man ang cctv nga bisan gani dili tinted helmet o kaha walay helmet ang isul-ob dili man gihapon maklaro.

Ang cctv recording o nahitaho na ang krimen apan ang police visibility mao ang pagpakgang sa krimen.