Nangunay na kay dehado na ba?

Gikuyawan ang kampo ni Mayor Tomas Osmeña sa dagan sa kampanya sa eleksiyon sa barangay. Mao tingali kini ang hinungdan nga miaplay na kini og mga taktika aron maseguro ang iyang mga manok nga naggikan sa kontrobersiyal nga Barangay Mayor’s Office.

Unang gihimo sa kampo sa mayor mao ang paglubag sa DSWD aron makapanghatag sa tag-P10 mil nga sustainable livelihood program (SLP) atol sa campaign period sa eleksiyon sa barangay. Wala mosaler, kay natiktikan sa kampo ni Bise Mayor Edgardo Labella.

Ning bag-o lang, si Kapitan Ramil Ayuman mireklamo tungod sa matud niya planong pagpanikas sa kampo ni Tomas pinaagi sa paggamit sa mga empleyado sa Cebu City Hall isip mga third member sa Board of Election Tellers nga idestino sa mga presinto atol sa eleksiyon.

Kining mga election tellers kritikal kaayo og papel sa eleksiyon. Mahimo nilang maniobrahon ang resulta sa eleksiyon. Nakasuway na ko niini niadtong barangay election sa 2010. Tulo ka presinto sa main building sa San Nicolas Elementary School ang gigamit sa grupo sa among kontra.

Nahibulong ang among mga watchers sa tulo ka presinto nganong wala na mamalik ang mga election tellers, kun BOT sa tulo ka presinto nga ilang gibantayan human mananghid nga manihapon.

Sa sigeng bantay, kalit lang may misinggit nga among supporter nga tua na diay sa presinto sa Barangay Duljo-Fatima gihimo ang eskutinyo. Nanagan kaming tanan, apan pag-abot namo didto, hapit-hapit na mahuman ang eskutinyo, unya puwerte na namong layoa. Hapay mi’ng tanan, wala’y nakalusot bisan usa.

Adunay mga election operator nga magpabayad. Kasagaran niini abogado nga adunay law firm. Adunay opisyal, o kanhi opisyal sa siyudad nga adunay koneksiyon sulod sa Commission on Elections nga gustong makakuwarta sa eleksiyon. Raket nila kini matag eleksiyon. Mao kini ang angayang bantayan sa isi’g ka habig.

Kamo diha sa San Nicolas-Proper, Lahug, Apas, Tisa, Basak-San Nicolas, Guadalupe, ug Labangon bantayi ninyo ang inyong mga presinto. Nakaseguro ko nga adunay mohimo og milagro diha.

Laing tilimad-on nga nagtakilid ang kampo ni Tomas mao ang pagpangunay og kampanya nilang Konsehal Margot Osmeña ug Kongresista Bebot Abellanosa ngadto sa ilang mga kandidato nga sakop sa BMO. Adunay nakakuha og video diha sa San Nicolas-Proper nga mismo si Margot ug Bebot mikampanya sa ilang BMO nga giingong nagtakilid na.

Nganong mangunay man og pangampanya sa ilang mga manok kon dumadaog na?

Pero ang ako lang unta ba, wala lang gyud unta’y bintahaay. Kining eleksiyon sa barangay non-partisan man unta kini nga dili angayan apilan sa mga politikong sakop sa usa ka partido.

Maayo tingali nga lili-on sa Comelec, Ombudsman, ug DILG kining pagpangunay og pangampanya nilang Margot ug Bebot.