Pundo sa DSWD gipamolitika

Nasakpan sa Duterte administration ang binuang unta sa kampo ni Mayor Tomas Osmeña gamit ang P600 milyones nga pundo gikan sa Department of Social Welfare and Development (DSWD-7) alang sa tag-P10 mil nga cash assistance sa mga kabus nga residente sa siyudad. Naabot sa DSWD central office ang estorya nga gigamit ni Tomas sa pamolitika ang pundo pinaagi sa pagpang-apud-apod niini ngadto sa kabarangayan nga siya ug ang iyang mga Barangay Mayor’s Officer ang kuyog sa DSWD-7.

Ang chairman sa PDP-Laban Cebu City Chapter nga si Bise Mayor Edgardo Labella ang gipasanginlan ni Tomas nga “mibabag” mao nga wala na’y distribusyon sa tag-P10 mil hangtud sa eleksiyon sa barangay.

Sayop! Wala babagi ni Labella ang pagpang-apud-apod. Siya’y napangutan-an kalabot sa maong programa tungod kay si Labella man maoy adunay linya sa Malacañang tungod sa iyang posisyon sa administration party. Nabadlongan si DSWD-7 direktor Ma. Evelyn Macapobre sa dihang nang-distribute og tag-P10 mil nga cash assistance didto sa barangay Mambaling nga gikuyog si Tomas.

Girason ni Macapobre nga gusto kuno ni Senador Loren Legarda nga si Tomas gyu’y ikuyog. Si Legarda ba diay ang amo ni Macapobre? Duha ka semana ang nakalabay, motungas na usab unta sa bukirang barangay ang grupo ni Tomas aron mang-apud-apod.

Apan nabadlongan na gyud si Macapobre sa iyang mga labaw sa DSWD Manila nganong iyang ipagamit sa politika ang pundo nga iya sa DSWD, ug nga si Tomas sakop man sa Liberal Party. Mao kini hinungdan nga wala mahinayon ang pang-apud-apod sa bukid, ug ang gipasanginlan ni Tomas si Labella.

Ang maayo gud niini, ang distribusyon himuon human na ang eleksiyon kay kon karon, ang BMO ra ni Tomas ang mabulahan. Gikabalak-an nga ang mga sakop sa BMO kon dili manguwarta sa solicitation, ipamaligya ang mga tambal nga libre ra unta sa DOH.

* * *

Kon makadaog, dili ba kaha mapriso, o mag-atubang og pagkasuspenso ang kapitan sa barangay Guadalupe nga si Michael Gacasan? Adunay Notice of Disallowance gikan sa COA tungod sa anomalosong pagpalit og trak sa bombero gikan sa mga bidder nga wa’y klarong mga address. Nasakpan sa COA ang discrepancy sa “amount” sa (words ug figures) sa official receipt gikan sa supplier.

Si Gacasan ug tibuok niyang konseho nag-atubang usab og kaso sa Ombudsman tungod sa kalapasan sa R.A. 3019 (dishonesty) tungod sa pagpalit og e-battery. Unsa ka tinuod nga dili e-battery ang gi-deliver? Ang COA nag-imbestigar usab karon sa mga unliquidated cash advances sa Guadalupe nga nagbalor og P7.1 milyones, ug gipasanginlan usab sa maong ahensiya og splitting of contracts nga gidili sa balaod. Ang COA mihatag usab og mga notice of suspension sa gipamalit nga tambal sa barangay balor og P649,360, duha ka dump truck balor og P4.4 milyones.