General Quenery gising sir!

Angay nga mandoan ni Police Regional Director Robert Quenery ang kapolisan nga paspasan ang kampanya batok sa illegal gambling.

Kon dili mohimo niini si General Quenery, dili siya makabasol nga magduda ang katawhan kaniya nga apil siya nga nakakuwarta kay gipasagdan ra ang nagkagrabe na nga sugal, sama sa illegal swertres, video karera ug moli-moli.

Nahinumdom mo nga ang kanhi hepe sa Police Regional Office-7 gipasanginlan usab kaniadto nga nagdawat og dagko kaayong payola gikan sa mga operator sa illegal gambling kay wala’y gihimo bisan naghitak na ang mga ilegal nga sugal?

Karon, lutaw na kaayo ang inpormasyon nga pipila ka opisyal sa kabarangayan dinhi sa Sugbo, ang uban nia sa siyudad, maoy nag-operate og illegal swertres, apil pa gani ang video karera.

Mao kini nga bisan og niundang na ang ubang operator sa illegal nga sugal, apan anaa gihapon ang mga sugal sa kabarangayan kay ang mga opisyal man maoy nag-operate.

Nganong wala man gyud makahimo pagronda ang kapolisan sa illegal swertres diha sa Barangay Suba ug Pasil? Sa Barangay Kamagayan ug sa Barangay Guadalupe? Kining maong mga barangay anaa ang “home base” sa illegal swertres.

Unya, ang mga video karera ug moli-moli mikatap karon diha sa Barangay Ermita, Suba, Pasil, Tejero, Duljo-Fatima, apan wala gyud tagda sa kapolisan. Sa swertres, kon may dakpon man, ang mga ushers lang intawon ang madali sa pagdaug-daog.

Diay nadawat nako nga report nga grabe ang illegal swertres sa Barangay Bawo, Sogod. Illegal swertres kusog sab kuno sa Barangay Can-asojan, Carcar.

Ang usa sa nag-operate og illegal swertres sa Carcar mao kadtong tawo nga gipusil dinhi sa dakbayan sa Sugbo, apan wala mamatay. Padayon diay ang iyang negosyo.

Unya, video karera diha sa Belgium Street, Barangay Suba, dakbayan sa Sugbo dapit sa bakery mga upat ka balay gikan sa Anit Store. Shabu das-ag sab.

Sa Sitio Ponce 2 sa Carreta, may nag-operate usab nga mga video karera. Ang nipahibalo nako miingon nga ipasusi kuno sa ilang Elna, Mailou ug Ludy.

May mga polis man diay nga mag-anhaan gud mao diay nga dili madakpan kay may proteksyon sa mga polis nga ang apelyido nagsugod og “P” ug “C.”

Unya, diha sa may nasunogan sa Barangay Pasil, uy daghan man gihapong video karera nga wala pangsakmita sa mga polis. Hasta sab kuno diha sa Sitio Mahayahay 2. Susiha kuno sa ilang Myka ug Stephen.

Sa Duljo-Fatima may duha ka video karera naa kuno sa Sitio Bohol village, naa sa’y mga karera sa Riverside ug Sitio San Pedro. Pun-an ni nato unya.