Usa ka isyu nga angayan tutokan sa atong katilingban mao nga ang kabataan karon bisan sa linghod pa nilang pangedaron, nahasubay na sa dalan nga padulong sa ilang kaalaotan.
Niadtong Biyernes sa gabii, gidala nako ang akong pamilya sa Hoopsdome sa dakbayan sa Lapu-Lapu kay makigtan-aw lagi ang akong asawa ug anak sa search for Reyna Bulakna nga usa sa kalihokan sa Kadaugan sa Mactan.
Tungod kay distansya ra ang among giparkingan, naglakaw kami paingon sa venue. Pagkanaog pa lang namo sa awto, hilabihan na ka daghan sa mga batan-on nga anaa sa palibot.
Apan wala man moadto sa hoopsdome, didto ra man sa daplin ug sa center island nanglingkod, ang uban magpatunga na gani sa karsada nga hilabihan na ka wild.
Pulos mga menor de edad, mga lalaki ug babaye, apan ang mga babaye nagsul-ob na og grabe ka revealing, o hilas kaayo nga senina.
Wala’y mapili, ma lalaki, o babaye, nanigarilyo ug klaro kaayo nga wala sa ilang maayong paminsar kay magsige og katawa nga sipa kaayo.
Ang nakapaalarma nako kay mismo sa karsada nagsinabakay ug naghinagkanay ang mga menor de edad. Akong gianinaw ang palibot, halos wala’y mga dagko nga nakasagol sa crowd, mora’g nahimong venue sa dakong panagtigum sa mga batang hilas ang maong dapit niadtong higayona.
Mora’g sila ang mga sakop sa gitawag nga fam group, o gang. Duol ra sa police station ug naay mga sakop sa Claf atubangan sa hoopsdome, apan wala’y kukahadlok ang mga batan-on, wala man pud sila sitaha, ambot ngano.
Asa man diay ang mga ginikanan niining mga bataa? Kini ang pangutana sa akong 12 anyos nga anak nga nakasaksi sa gibuhat sa mga kaedad niya nga hilabihan ka liberated.
Ako mismo nga nakasaksi, morag na shock nga dili katoo sa akong nakita. Mas labaw pa man diay ka hilas ning mga bataa kon itandi sa mga western countries.
Kagamhanan, simbahan, katilingban, labaw sa tanan kitang mga ginikanan, maghiusa kita niining isyuha.