Nagduda ko da

Dili kaha pormalidad na lang ang gihimo sa mga sakop sa NEDA-Investment Coordination Committee (ICC) nga kunohay tun-an nila pagbalik ang BRT project dinhi sa Sugbo apan ila ra gyud ni nga ipakanselar?

Mora og nakabantay ko nga kuwang og kaikag si Presidente Duterte nga madayon kining BRT project sa Sugbo, kay kon misuporta pa si Digong, hagbay ra unta niya nga gibadlong si Presidential Assistant for the Visayas Michael Dino nga dili supakon ang proyekto.

Apan gipasagdan ra niya si Dino nga nagsige’g supak sa proyekto, ug nakigbangi ni Mayor Tomas Osmeña nga maoy miduso niining proyektoha sa pagtuo nga makatabang kini sa pagsulbad sa problema sa trapiko.

Wala kaha hunghongi ni Duterte ang kadagkoan sa NEDA nga himoon lang ang pormalidad ug dili lang direkta nga kanselahon ang proyekto? Ang akong pangagpas nga dili makabalibad ang NEDA-ICC kon kagustohan na sa presidente.

Dugaya sab bitaw sa Department of Transportation (DOTr) nga naka-hire og mga consultants nga makatabang sa paghuman unta sa detailed engineering sa proyekto uy.

May mitug-an nako nga dunay gustong kuhaon ang DOTr nga consultants alang sa BRT project, apan pulos mibalibad kay maglisud sila pag-justify nga ang proyekto hingpit nga makasulbad sa problema sa trapiko dinhi sa dakbayan.

Nindot unta kadto nga ang giingong feasibility study sa maong proyekto ipresentar unta sa publiko, pinaagi sa pagpublikar niini sa mga mantalaan, aron makita kini sa katawhan.

Unya, ambot kon ngano nga dugay man usab kaayong napalapdan ang mga karsada nga maoy agian sa BRT, gikan sa Bulacao subay sa Natalio Bacalso Avenue, Osmeña Boulevard, Escario Street, Archbishop Reyes Avenue, Gov. Mariano Cuenco Avenue lahos na sa Talamban.

Dili man ikalimod nga gagmay ang ubang bahin sa karsada nga subayon sa BRT. Kanunay ko nga mag-agian sa Escario Street nga four lanes ra, tagduha ka lane paingon sa usa ka direksyon.

Pagka karon lang gani, maghuot na ang mga sakyanan diha sa Escario, mosamot na gyud kon gamiton ang duha ka “lane” sa tunga aron himoon nga “exclusive lanes” para lang sa BRT.

Sa ako na nga giingon, ang BRT makatabang pagsulbad sa traffic problem apan kinahanglang unahon ang pagpalapad sa karsada sa dili pa tugotan nga maka-operate ang mga dagkong bus nga molangkob sa BRT.

Apan karon nga ang isyu sa BRT tua na sa mga kamot sa NEDA-ICC, gikulbaan ko nga hukman kini nga kanselahon na lang. Kon mahitabo nga mohukom gani ang NEDA-ICC nga ikanselar ang proyekto, posible gyud nga ang ilang hukom maoy gamiton sa kagamhanan pagpakanselar sa kontrata niini sa World Bank.