Lapu-Lapu Day

Non-working holiday karon sa Dakbayan sa Lapu-Lapu. Sa ato pa, local holiday lang, dili national holiday, kay alang sa Imperial Manila ang mga Tagalog ra nga mga bayani ang angay’ng pasidunggan sa tibuok nasud.

Wa ta’y mahimo niini, kay ila kining kagustoan didto sa kaulohan, bisan tuod og mas heroic pa tingali ang nahimo ni Lapu-Lapu kay sa uban nilang mga bayani.

By the way, sa pagpanukiduki sa akong Brod, si Lory, iyang nahibaw-an nga ang ngalan sa giilang bayani sa Mactan, mao gyud ang Lapulapu, nga wala’y hyphen.

Ang pulong kuno nga Lapu-Lapu, nga adunay hyphen, ang gipasabot niini mao ang isda. Mao tingali nga ang dakbayan sa Lapu-Lapu, langsi kaayo, nanimahong isda.

Bitaw, mahimo sab nga nasayop si Lory niini, apan, sa akong hunahuna, wala pa mouso ang hyphen niadtong mga panahona, ug imposible kaayo nga ang giilang hari sa Mactan inigsuwat niya sa iyang ngalan gisal-otan niya og hyphen.

By the way, nasayran nga pag-abot sa mga Katsila dinhi, giingon nga literate na ang mga lumad natong katigulangan. Kamao na nga mobasa ug mosuwat, ug lagmit usa na niini si Lapu-Lapu.

Hinoon, nalipay kita nga ato na nga gisaulog ang Lapu-Lapu Day. Salamat ni kanhi Customs Collector Boy Odilao, nga tapus sa Sinulog, iya usab nga nahunahunaan ang pagsaulog sa Bahug-Bahug, karon Kadaugan sa Mactan.

Lipay sab kaayo ko, kay sa amo gud nga panahon, sa mga bata pa mi, inig-suroy-suroy namo sa Mactan, ang monumento man ni Magellan ang kanunay namong makit-an, nga alang namong mga bata, si Magellan maoy hero sa Mactan.

Naay monumento ni Lapu-Lapu sa Poblacion sa Opon, apan sukad wa ko kahinumdom nga adunay selebrasyon pagpasidungog ni Lapu-Lapu nga gipahigayon diha sa maong monumento.

At any rate, maghuwat na lang ta nga ma-recognize sa tibuok nasud ang pagka-bayani ni Lapu-Lapu, nga kon atong gisaulog ang Death March sa Bataan, nga naghulagway sa atong kapildehan, nganong dili man mouban kanato ang tibuok nasud pagsaulog sa Kadaugan sa Mactan?

* * *

Adunay kalihokan ang American Association of Retired Persons (AARP) alang sa pagpahimsog sa lawas, mga programa ug mga kalihokan nga mahimong atong i-duplicate dinhi sa atong nasud, particularly dinhi sa atong dakbayan ug lalawigan.

Aduna sila’y tulomanon nga mag-encourage sa healthy living pinaagi sa mga fitness classes, social gatherings, ug mga seminar on healthy living.

Ang ubang kalihokan naglakip ning mosunod: senior olympics, walking, biking, boating, fishing, swimming, tennis, badminton, softball, dancing, pingpong, ug golf (mahal ni).