CEBU, Philippines – Patay ang usa ka lalake human napusilan sa mga polis nga gisuwayan niini og tigbas diha sa Sitio Pag-umbangan, Brgy. Tiguib, Argao niadtong miaging adlaw.
Ang suspek nga napusilan mao si Juan Banual Cambari, 37, giingong may kakulian sa pangisip. Ang amahan sa suspek nga si Juan Marciano Cambari, nangayo og tabang sa kapulisan tungod sa pagpanghasi sa anak nga nagdala-dala og pinote ug gisuwayan sila sa iyang usa pa ka anak pagtigbas.
Naabtan sa mga polis nga nagbarog sa ilang pultahan apan nagbitbit gihapon og pinote ang suspek. Si PO2 Howard Maynopas misuway pagpatahan kaniya apan gitigbas na hinuon kini kaduha apan swerteng wala makaigo hinungdan nga napusilan kini sa maong polis diha sa tiyan.
Gidala ang suspek sa Isidro C. Kintanar Memorial Hospital apan nakabsan kini sa kinabuhi pagkagabii. (CNU Intern/IBM)(BANAT NEWS)