Kini ang magkasumpaking mga baruganan. Tingali tungod kay daghan nato ang buot mamahimong komportable lang sa atong pagabuhaton nga mga butang. Dili kita buot og sakripisyo ug labaw na nga dili kita buot og kompormiso. Buot kitang matagbaw ug buot natong puy-an ang bisan unsang hayahay ug nindot. Apan ang kinabuhi sa kanunay dunay tugbang responsibilidad. Ug matag responsibilidad kinahanglang tumanon uban ang kamakanunayon. Kini ang kahulogan kun maghisgot kita og disiplina. Ang disiplina mahinungdanon kaayo aron sa ingon mamahimong mas dunay tumong ang matag panlimbasog. Ang disiplina wala gamita aron ang tawo mag-antos. Ang disiplina anaa aron sa ingon ang matag tawo mamahimong mas mohamtong pa nga sa pagsabot nga diha sa buluhaton kinahanglan nga kini seryosohon.