Sa medikal nga termino, ginganlan kini og ‘hemmorhoids,’ o ‘piles,’ ang almoranas. Sa yano nga pagkasulti butbot kini sulod ug duol sa gawsanan sa hugaw nga kon mogawas gani nga magdugo, mao ni ang makapasakit, apan mosulod ra sab og balik.
Sa kadugayan, kon magkagrabe kini, modako ang burot nga mamula, pirme na magbitay sa kibot, hangtud nga ma-infected. Hasol kaayo nga dili kita katarong og posisyon kay matandog man iniglingkod ug mapusa.
Aron dili kita maapektohan ning maong kondisyon, angay magkat-on kita sa pag-alibyo niini, o kaha aron dili kita magka-almoranas. Apan kinahanglan nga masayod kita, unsa’y mga sintomas ug mga hinungdan nga maoy nakaingon niini.
Ang almoranas, sagad motumaw kini niadtong wala kaayo’y kalihokan, o pisikal nga ehersisyo. O kaha, kanunay lang nagtindog, o nagbarug og dugay. Posible sab sa mabdos, mga edaran na, pirme nangalsa og bug-at. Ang konstipasyon, usa sab kini sa naglabing hinungdan sa almoranas.
Aron malikayan ang almoranas, sa panahon nga kalibangon, relaks lang nga hulaton mogawas nga komportable, labi na og gahi ang hugaw, ayaw ipugos nga magsise’g utong-utong kay magasgas ang butbot nimo, hangtud nga ma-develop nga kini ma-infection. Hasta sab sa subra ang gidak-on, o naghinubra sa timbang, usa sab kini sa hinungdan sa almoranas.
Unya inighuman og paggawas sa hugaw, ayaw gamiti og tisyu nga papel, kon dili tubig la’y ihugas, para dili mabaid ang ngabil sa kibot kay basin og kini maimpekted. Aron gyud dili maproblema sa almoranas, palabiha kanunay ang pagkaon nga nagbaton og dasok sa ‘fibers’, aron pagpahumok sa imong hugaw.
Kini aron sab dili mabun-og o mapresyur ang pundohanan ug agianan sa hugaw.