Kadagatan panalipdan

Ang nahitabo sa Boracay, dili layo nga mahitabo usab dinhi sa Sugbo, kon magpadayon ang pagpasagad sa katawhan nga dili mohatag og bili sa kadagatan.

Gani, ang sandbar sa Sumilon Island sa lungsod sa Oslob gipasirad-an sa lokal nga kagamhanan sulod sa usa ka semana aron kalimpyohan ang dagat gikan sa nagtipun-og nga hugaw nga gibiyaan sa mga tawo atol niadtong Semana Santa.

Apan gamay nga portion lang sa isla ang gisirad-an sanglit ang usa ka pribadong beach nga anaa sa isla nagpadayon ang operasyon. Ang Sumilon Island adunay gilapdon nga 24 ka ektarya, ang 17 niini pribado ug pito ka ektarya lang ang gidumala sa kagamhanan sa Oslob, lakip niini ang sandbar nga gipasira og usa ka semana.

Akong nahinabi ang marketing manager sa pribadong beach resort sa Sumilon nga may beach resort usab sa dakbayan as Lapu-Lapu ug Panglao sa Bohol.

Giklaro ni Eric Monsanto nga sa pagsugod pa lang sa operasyon sa ilang hotel ug beach resort, mipatuman na sila og mga lakang nga pagsiguro nga dili maabusohan ang kadagatan.

Gipakita nila kanako kon giunsa nila sa pagproseso ang ilang mga ginamit nga tubig, o water waste ug ang mga basura, ilabi na kadtong malata sama sa mga salin nga pagkaon.

Ang 150 thousand cubic meters nga water discharge sa hotel kada adlaw sa dakbayan sa Lapu-Lapu, iproseso nila sa ilang water treatment facility. Ingon usab niini ang gihimo sa Sumilon nga adunay water discharge nga moabot sa 30,000 cubic meters kada adlaw.

Ang treated water, imbes ilabay sa dagat, ila kining gigamit sa pagbisibis sa mga tanom, plainly sa hotel ug uban pa nga kagamitan. Ang mga malata nga basura giproseso nila aron mahimong abuno sa ilang organic garden. Nagpasabot nga wala gyu’y hugaw nga makaadto sa dagat.

Kon ingon niini ang gihimo sa tanang hotels, seguradong dili gyud mahisama sa Boracay ang kadagatan sa Sugbo. Lihok na sa dili pa ulahi ang tanan, panalipdan ang kadagatan kay kita ra ang mabulahan.